Azııa chempıonatynda jeńiske jetken aqmolalyq boksshylar aqshalaı syılyqqa ıe boldy
Baıraqty jarysta jeńis tuǵyrynan kóringen sportshylar Aqmola oblysynyń ákimi Málik Myrzalınniń atynan Alǵys hat jáne aqshalaı syılyqpen marapattaldy. Onyń ishinde Azııa chempıony Talǵat Sháıken men onyń jattyqtyrýshysy Qýat Beısenbaev, kúmis júldeger Aızada Eslıamǵalı men onyń jattyqtyrýshysy Oldas Sultanbekov bar.
Marapattaý rásiminde oblys ákiminiń orynbasary Aına Mysyrálimova sportshylar men olardyń jattyqtyrýshylarynyń eńbegin erekshe atap ótti.
«Sizder elimizdiń naǵyz patrıotysyzdar. Sizderdiń arqalaryńyzda kók baıraǵymyz halyqaralyq jarystarda jelbireýde», - dedi A.Mysyrálimova.
Aqmola oblysynyń dene shynyqtyrý jáne sport basqarmasynyń baspasóz hatshysy Mahabbat Bolshınanyń málimetinshe, Taıland astanasy Bankok qalasynda jastar arasynda ótken bokstan Azııa chempıonatynyń qorytyndysy boıynsha Qazaqstan quramasy jalpy komandalyq esepte birinshi oryn aldy. Ulttyq qurama 10 altyn, 4 kúmis jáne 4 qola medal ıelendi. Onyń ishinde Aqmola oblysynan qatysqan Talǵat Sháıken 64 keli salmaqta chempıon atansa, Aızada Eslıamǵalı 54 keli salmaqta kúmis ıelendi.