Azııa chempıonatynda qazaqstandyq balýan qyzdar úsh júlde aldy

ASTANA. QazAqparat – Iordanııa astanasy Amman qalasynda ótip jatqan Azııa chempıonatynda áıelder kúresinen elimizdiń 15 jasqa deıingi jasóspirimder quramasy 3 medal aldy, dep habarlaıdy QazAqparat tilshisi.

12 shildede kúres túrlerinen 15 jáne 20 jasqa deıingi jasóspirimder men jastar arasynda Azııa chempıonaty jalaýyn kóterdi.

Jarystyń ekinshi kúni, 13 shildede áıelder kúresinen el quramasy qorjynyna úsh júlde tústi.

Qurlyqtyq dodada Sanııa Soltanǵalı (39 keli) men Meıramgúl Ahmetjan (46 keli) fınalda qarsylastaryna ese jiberip, kúmis júlde aldy.

Al Farıda Abdrahmanova (50 keli) qola júldege qol sozdy.

Eske salsaq, budan buryn grek-rım kúresinen 15 jasqa deıingi jasóspirimder arasynda qazaqstandyq balýandar 3 altyn, 2 kúmis jáne 3 qola medal aldy.