Azııa chempıonatynda elimizdiń jas shahmatshylary 14 medal enshiledi
ASTANA. QazAqparat - 6-12 jas sanatyndaǵy uldar men qyzdar arasynda shahmattan Azııa chempıonatynda Qazaqstan komandasy óz tarıhynda úzdik nátıje kórsetti. Bul týraly búgin elordada ótken brıfıngte QR balalar men jasóspirimder quramasynyń bas jattyqtyrýshysy Murtas Qajyǵalıev málim etti.
«Tashkentte Qazaqstan quramasy úzdik nátıje kórsetti. Komandamyz buǵan deıin Azııa chempıonatynda munsha medal alǵan emes. Ótken jyly bizde nebári 2 medal bolsa, bul joly 14 medal enshiledik», - dedi ol.
Brıfıngten keıin Azııa jeńimpazdary men júldegerlerine Qazaqstan Shahmat federatsııasy atynan baǵaly syılyqtar tartý etildi.
Aıta keteıik, 20-29 maýsym kúnderi Tashkentte ótken chempıonatta qazaqstandyqtar barlyq jas sanatynda medaldarǵa ıe bolǵan edi. Atap aıtqanda, Sátbek Ahmetdınov altyn medal alsa, Ańsat Aldııar (klassıka men blıts), Aıda Aıdarqyzy (klassıka), Ásel Serikbaı (blıts), Ámına Qaıyrbekova (klassıka men blıts), Nazerke Nurǵalı (klassıka), Bıbisara Asaýbaeva (klassıka) kúmis, Zeınep Sultanbek (rapıd pen blıts), Qazybek Nógerbek (rapıd pen blıts) jáne Merýert Kamalıdenova (rapıd) qola medal enshilegen edi.
Qazaqstannyń jas shahmatshylary úshin kelesi mańyzdy jarys osy jyldyń qyrkúıeginde Serbııada ótetin álem chempıonaty bolmaq. Oǵan daıyndyq osy aptada bastalady.
