Azııa chempıonatynda búgin toǵyz qazaqstandyq boksshy fınalǵa shyǵý úshin talasady

ASTANA. QazAqparat – Iordanııa astanasy Amman qalasynda bokstan ótip jatqan Azııa chempıonatynda búgin áıelder arasynda jartylaı fınaldyq jekpe-jekter ótedi, dep habarlaıdy QazAqparat tilshisi.

Qazaqstannan toǵyz boksshy fınalǵa shyǵý úshin talasady.

Astana ýaqytymen saǵat 16.00-de bastalatyn kúndizgi sessııada eki márte álem chempıony Nazym Qyzaıbaı (50 kg) ekinshi jupta japonııalyq Namıkı Tsýkımımen sheberlik baıqasady.

Sodan keıin tórtinshi jupta Jaına Shekerbekova (54 kg) taıvandyq Hýan Sıao Venmen, Mádına Nurshaeva (66 kg) ońtústikkoreıalyq Choı Hon Gıýnmen (8-jup), Lázzat Kúngeıbaeva (+81 kg) úndistandyq Alfııa Tarannýmmen (11-jup) qolǵap túıistiredi.

Saǵat 21.00-de bastalatyn keshki sessııada birinshi bolyp Alýa Balqybekova (48 kg) shyǵady. Onyń qarsylasy – ózbekstandyq Farzona Fozılova.

Sondaı-aq Jazıra Oraqbaeva (52 kg) japonııalyq Rınka Kınosıtemen (4-jup), Karına Ibragımova (57 kg) fılıppındik Nestı Petesıomen (6-jup), Darıǵa Shákimova (70 kg) taǵy bir taıvandyq Chen Nen Chınmen (10-jup) kezdesedi. Qazaqstandyqtar úshin boks keshin Gúlsaıa Erjan (81 kg) Vetnam ókili Thı Hýong Ngýenmen (11-jup) túıindeıdi.

Bul Azııa chempıonatynda barlyǵy 21 qazaqstandyq boksshynyń jartylaı fınalǵa joldama alǵany belgili. Jartylaı fınaldyq jekpe-jekti erler erteń ótkizedi.

Eske sala keteıik, budan buryn Azııa chempıonatyn Qamshybek Qońqabaevtyń jeńispen túıindegenin jazǵan bolatynbyz.

Foto: assets.telegraphindia.com