Azııa chempıonaty: Jartylaı fınalda 11 boksshymyz synǵa túsedi
NUR-SULTAN. QazAqparat - Bokstan Azııa chempıonatynyń shırek fınaly máresine jetti. Qazaqstandyq 11 bylǵary qolǵap sheberi jartylaı fınalǵa joldama aldy, dep habarlaıdy QazAqparat tilshisi.
Aıta keterligi, Taıland eline bizdiń eldiń jigitteri men qyzdar quramasy tolyq quramda attandy. Degenmen búgingi kúnge deıin el namysyn qorǵaǵan 10 jigittiń arasynan Ánýar Muzapparov (52 keli) jáne Qaırat Erálıev (56 keli) jarys jolynan shyǵyp qaldy. Búgin olardyń qataryna Aslanbek Shymbergenov (69 keli) qosyldy. Ol Bobo-Ýsmon Batýrovtan jeńildi. Endi jartylaı fınalda jigitterden Temirtas Júsipov (49 keli, Zakır Safıýllın (60 keli), Sanatáli Tóltaev (64 keli), Tursynbaı Qulahmet (75 keli), Bek Nurmaǵanbet (81 keli), Vasılıı Levıt (91 keli) jáne Qamshybek Qońqabaev (91 keliden joǵary)
Al budan buryn qyzdardan Sánııa Sultanqyzy (57 keli) jáne Alýa Balqybekova (48 keli) qarsylastarynan ese jiberse, búgin Dına Jolaman (54 keli) qytaılyq Shýan Shıge, Rımma Volosenko (60 keli) úndistandyq Laıshram Devıge jol berdi. Al Aqerke Baqytjan (75 keli) qytaılyq Lı Shıannan, Nazym Qyzaıbaı (51 keli) úndistandyq Zaın Nıhattan jeńilip qaldy. Endigi kezekte qyzdardan 4 boksshy jartylaı fınalda synǵa túsedi. Olardyń qatarynda Mılan Safronova (64 keli), Darıǵa Shákimova (69 keli), Farıza Sholtaı (81 keli) jáne Lázzat Kúngeıbaeva (81 keliden joǵary) bar. Mılan Safronova búgin japon Aıaka Tagýchıdi tize búktirse, keshe Darıǵa Shákimova Mońǵolııadan kelgen Erdenetýıa Enhbaatardy súrindirdi. Jerebe nátıjesimen Farıza Sholtaı (81 keli) men Lázzat Kúngeıbaeva (81 keliden joǵary) birden jartylaı fınalda synǵa túsedi. 
Azııa chempıonatyna Qazaqstan quramasy 1994 jyldan beri qatysyp keledi. Bizdiń boksshylar jalpy komandalyq esepte altyn alý jónine 1994, 1995, 2004, 2011, 2013, 2015 jyldary kósh basynda bolǵan edi.
