Azııa chempıonaty: Jamby atýdan jeńimpazdar men júldegerler anyqtaldy
ALMATY. QazAqparat - Almatyda Ulttyq at sportynan ótip jatqan І Azııa chempıonatynda jamby atýdan jeńimpazdar men júldegerler anyqtaldy, dep habarlaıdy QazAqparat tilshisi.
QR Ulttyq sport qaýymdastyǵy málim etkendeı, jamby atý saıysyna 7 memleketten kelgen 12 mergen synǵa tústi.
Atap aıtar bolsaq, Qazaqstannan - 3, Mońǵolııadan - 3, Majarstannan- 2, Reseıden - 1, Ózbekstannan - 1, Malaızııadan - 1, Túrkııadan - 1 sportshy baq synady.
Azııalyq jamby atý saıysy azııalyq stıl, túrik stıli jáne qazaqtyń ejelgi jamby atý óneri boıynsha úsh kezeńnen turdy.
Alǵashqy azııalyq stılmen nysana kózdeýde otandasymyz Aıkóz Eralhanǵa teń keler eshkim bolǵan joq. Ol 27,1 upaı enshiledi. Ekinshi orynǵa 26,94 upaımen mońǵolııalyq sportshy Túmenbaıyr Otgonbaıyr ıe bolsa, úzdik úshinshi orynǵa 26,69 upaı enshilegen taǵy bir Mońǵolııa mergeni Kúslen Chýlýýnbaatar jaıǵasty.
Al túrik stılinde jerlesimiz Baqdáýlet Babajan 55,28 upaımen kósh bastasa, ekinshi oryndy azııalyq stılde top jarǵan jerlesimiz Aıkóz Eralhan 48,88 upaımen jeńip aldy. Al alǵashqy úshtikti majastannyń jas mergeni Zolt Lızıska 38,85 upaımen qorytyndylady.
Sońǵy jamby qazaqtyń ejelgi jamby atý saıysynan otandasymyz Baqdáýlet Babajanǵa eshkim teń kelgen joq (53,28 upaı). Ekinshi orynǵa mońǵolııalyq mergen Túmenbaıyr Otgonbaıyr (30 upaı) ıe bolsa, úshinshi orynǵa majarstandyq mergen Zolt Lızıska (28,3 upaı) ıe boldy.
Osylaısha jamby atý saıysynyń jeńimpazdary joǵaryda atalǵan úsh túrli stıldiń jalpy upaılary birge eseptelip, eń kóp upaı jınaǵan mergen jeńimpaz atanady.
Sonymen jalpy esep qorytyndysy boıynsha bas júldeni (1-týr - 24,03; 2-týr - 55,28; 3-týr - 53,28) 164,62 upaı enshilegen jerlesimiz Baqdáýlet Babajan qanjyǵasyna baılady. Ekinshi orynǵa (1-týr - 27,1; 2-týr - 48,88; 3-týr - 17,19) 118,27 upaı enshilegen taǵy bir otandasymyz Aıkóz Eralhan ıe bolsa, úzdik úshinshi orynǵa (1-týr - 26,94; 2-týr - 33,66; 3-týr - 30) 117,57 upaı enshilegen Mońǵolııa astanasy Ulanbatyr qalasynan kelgen mergen Túmenbaıyr Otgonbaıyr ıe boldy. Endi, jeńimpazdar men júldegerler 21 sáýir kúni marapattalady.
Esterińizge sala keteıik, osyǵan deıin teńge ilý saıysynyń jeńimpazdary men júldegerlerin jarııalaǵan bolatynbyz.
Jastar jylyna oraı uıymdastyrylyp jatqan birinshiliktiń jalpy júlde qory 16 mıllıon teńgeni quraıdy. Chempıonatty Almaty oblysy ákimdiginiń qoldaýymen QR Ulttyq sport qaýymdastyǵy uıymdastyryp jatyr. Atalǵan dodaǵa Azııanyń 10 elinen sportshylar qatysýda. Olar kókpar, aýdaryspaq, teńge ilý jáne jamby atý sportynan baq synap jatyr.
