Azııa chempıonaty: Voleıboldan Qazaqstan qyzdary jarystyń kelesi satysyna shyqty
NUR-SULTAN. QazAqparat - Ońtústik Koreıada ótip jatqan voleıboldan qyzdar arasyndaǵy Azııa birinshiliginiń toptyq kezeńi máresine jetti. Sońǵy týrda Qazaqstan quramasy Úndistan qyzdarynan basym tústi, dep habarlaıdy QazAqparat tilshisi.
V tobyndaǵy Qazaqstan men Úndistan arasyndaǵy kezdesý tórt setke sozyldy. Alǵashqy sette bizdiń qyzdar qarsylasyna 21:25 esebimen jol berdi. Qalǵan settiń barlyǵynda jeńiske jetti. Aldymen 25:16, odan keıin 25:19 jeńse, sońǵy sette 25:18 esebimen basym tústi. Osylaısha jalpy qorytyndy boıynsha 3:1 esebimen qarsylasyn qapy qaldyrdy.
Bizdiń toptaǵy taǵy bir kezdesýde Japonııa qyzdary Avstralııany 3:0 esebimen tize búktirdi.
Toptyq kezeńniń týrnır kestesinde birde-bir upaı joǵaltpaǵan Japonııa kósh basyna shyqty. Odan keıingi oryndaǵy Qazaqstan 6 upaı alsa, Avstralııa 3 upaı enshiledi. Al barlyq qarsylasyna ese jibergen Úndistan sońǵy orynda qalyp qoıdy.
Quramamyz budan buryn Avstralııany 3:0 esebimen jeńse, odan keıin dál osy eseppen Japonııaǵa ese jiberip qoıdy.
Qazaqstan qyzdary endi jeńimpazdar kezeńi satysynda F tobynda synǵa túsedi. Qarsylastary - Japonııa, Qytaı jáne Indonezııa quramalary. Al E tobynda Ońtústik Koreıa, Taıland, Taıvan jáne Iran quramalary sheberlik baıqasady.
Bizdiń qurama 22 tamyzda Qytaımen oınaıdy. Al 23 tamyzda Indonezııamen kezdesedi. Azııa birinshiligi 25 tamyzda máresine jetedi.
Bizdiń qyzdar Azııa birinshiliginde bıyl toǵyzynshy márte qatysyp otyr. Quramamyz 2005 jyly kúmis júldeger atanǵan bolatyn. Sol jyly fınalda Japonııaǵa 0:3 esebimen jeńilip qaldy. Qyzdarymyz ózderi qatysqan qalǵan Azııa birinshiliginde alǵashqy ondyqtan kórinip keledi.
