Azııa chempıonaty: Tórt birdeı qazaq balýany qola medal jeńip aldy
NUR-SULTAN. QazAqparat - Qytaıdyń Sııan qalasynda ótip jatqan Azııa chempıonatynda kezek grek-rım kúresi sheberlerine keldi, dep habarlaıdy QazAqparat tilshisi.
Grek-rım kúresi boıynsha qurlyq birinshiliginiń alǵashqy kúninde bes qazaq balýany qola júlde úshin kúresýge múmkindik aldy.
Qazaqstan qorjynyna alǵashqy júldeni 55 kg salmaqta kúresken Qorlan Jaqansha saldy. Ol ońtústikkoreıalyq Djeon Hekjındi 9:0 esebimen bet qaratpaı utty.
Tamerlan Shadýkaev ta 77 kg salmaqta qola júlde úshin básekede katarlyq Bahıt Sharıf Badrdy merziminen buryn tize búktirdi.
Sol sekildi Azamat Qustubaev 87 kg salmaqta tájik balýany Tohırjon Ohonovqa soqyr upaı ustatpady - 8:0.
Damır Kúzembaev 130 kg salmaqta úndistandyq Prem Premdi parterge jatqyzǵannan keıin turǵyzbady.
Tek 63 kg salmaqta qola úshin kilemge shyqqan Qudaıbergen Tursynbaev qana ırandyq Saman Morad Abdývalıge ese jiberdi.
Osylaısha grek-rım kúresinen el quramasy (bas bapkeri Nurym Dúısenov) birinshi kúni tórt qola júldege ıe boldy.
Erteń - kúres túrlerinen Azııa chempıonatynyń sońǵy kúni. Grek-rım kúresi sheberleri qalǵan salmaqtar boıynsha synǵa túsedi.
Eske sala keteıik, budan buryn qazaqstandyq erkin kúres sheberiniń Azııa chempıony atanǵanyn jazǵan bolatynbyz.
Foto: olympic.kz
