Azııa chempıonaty: Teńge ilý saıysynyń jeńimpazdary anyqtaldy
NUR-SULTAN. QazAqparat - Almatyda Ulttyq at sportynan ótip jatqan І Azııa chempıonatynda teńge ilý saıysynyń jeńimpazdary anyqtaldy, dep habarlaıdy QazAqparat tilshisi.
QR Ulttyq sport qaýymdastyǵy málim etkendeı, teńge ilý saıysy boıynsha 7 memlekettiń jetkinshekteri júldeli oryndardy sarapqa saldy.
Teńge ilý saıysynda Qazaqstannan Nurhan Eljanov, Ǵalymjan Іzjanov bastaǵan 2 jigitimiz el namysyn qorǵasa, Mońǵolııadan - 3, Aýǵanstannan - 3, Qytaıdan - 2, Ózbekstannan - 3, Reseıden - 3, Tájikstannan - 3, barlyǵy 19 sportshy baq synady. 19 sportshy úsh kezeń boıynsha baq synady.
Alǵashqy aınalymda 8 sportshy ózderiniń eptiligimen kózge túsip, kelesi kezeńge joldama aldy. Al ekinshi aınalymnan keıin teńge ilý alańynda qazaqstandyq eki oıynshy, mońǵolııalyq eki oıynshy jáne qytaılyq bir oıynshy qaldy.
Sheshýshi synda Qytaıda turatyn qandasymyz Nurbolat Tálipbaıuly 5-oryn alsa, baıan-ólgeılik Jeńisbek Serik pen Aıbolat Unat 3 jáne 4-oryndardy ıelendi.
Bas júldeni otandasymyz Ǵalymjan Іzjanov qanjyǵasyna baılasa, ekinshi orynǵa taǵy bir jerlesimiz Nurhan Eljanov qol jetkizdi.
Jeńimpazdardy marapattaý rásimi 21 sáýir kúni ótedi.
Esterińizge sala keteıik, jastar jylyna oraı uıymdastyrylyp jatqan birinshiliktiń jalpy júlde qory 16 mıllıon teńgeni quraıdy. Chempıonatty Almaty oblysy ákimdiginiń qoldaýymen QR Ulttyq sport qaýymdastyǵy uıymdastyryp jatyr. Atalǵan dodaǵa Azııanyń 10 elinen sportshylar qatysýda. Olar kókpar, aýdaryspaq, teńge ilý jáne jamby atý sportynan baq synaıdy. Jarys 21 sáýir kúni óz máresine jetedi.
