Azııa chempıonaty: Qazaqstandyqtar eki medal jeńip aldy
NUR-SULTAN. QazAqparat - Qytaıdyń Sııan qalasynda ótip jatqan kúres túrlerinen Azııa chempıonatynda qazaqstandyq qyzdar eki qola medalǵa qol jetkizdi, dep habarlaıdy QazAqparat tilshisi.
Erler arasyndaǵy erkin kúres sheberlerinen keıin bozkilemde áıelder kúresi bastaldy.
Atalǵan dodada 50 kelige deıingi salmaqta beldesken jerlesimiz Valentına Islamova qola medal úshin beldesýde úndistandyq Sıma Sımadan basym túsip, el qorjynyna alǵashqy júldeni saldy.
Ekinshi qola medalǵa 55 kelide baq synaǵan Marına Sedneva qol jetkizdi. Ol júldeli úshinshi oryn úshin beldesýde Ońtústik Koreıa ókili Haııýng Kımnen aılasyn asyrdy. Taǵy bir 68 kelide baq synaǵan qazaqstandyq balýan qyz Irına Kazıýlına qola medal úshin ótken beldesýde jeńilis tapty.
Esterińizge sala keteıik, osyǵan deıin erkin kúres sheberleri qurlyq dodasynan 2 altyn, 1 kúmis, 3 qola medal jeńip alǵanyn jazǵan bolatynbyz.
