Azııa chempıonaty: Qazaqstandyq voleıbolshylar ekinshi oıyn qatarynan jeńiske jetti
ASTANA. QazAqparat – Taılandtyń Nakhonratchasıma qalasynda ótip jatqan voleıboldan áıelder arasyndaǵy Azııa chempıonatynda Qazaqstan quramasy ekinshi márte jeńiske jetti, dep habardaıdy QazAqparat tilshisi.
Qurlyqtyq doda bıyl 22 márte jalaýyn kóterdi.
Qazaqstandyq voleıbolshylar D tobynda synǵa túsip jatyr. Qarsylastary – Gonkong, Fılıppın jáne Qytaı.
Búgin D tobyndaǵy 2-týrda Qazaqstan quramasy Gonkongty 3:0 (25:16, 25:23, 25:17) esebimen senimdi túrde jeńdi.
Keshe bizdiń voleıbolshylar Fılıppınmen oınap, taı-breıkte 3:2 (25:21, 17:25, 24:26, 27:25, 15:6) esebimen basym túsken edi. Endi olar erteń, 1 qyrkúıekte Qytaımen sheberlik baıqasady. Eki oıynnan keıin Qytaı 6, Qazaqstan 5 upaı jınap tur.
Azııa chempıonatynda barlyǵy 14 qurama baq synap jatyr. Olardyń arasynan úzdik shyqqan 3 qurama 2025 jylǵy álem chempıonatyna beriletin joldamaǵa qol jetkizedi. Jeńimpaz ben júldegerler 6 qyrkúıekte anyqtalady.
Aıta ketsek, qazaqstandyq voleıbolshylar Azııa chempıonatyna 12 márte qatysyp otyr. Ázirge eń úzdik jetistigi – 2005 jyly alǵan kúmis medal.
Al álem chempıonatynda 2006, 2010, 2014, 2018, 2022 jyldary baq synady. Qazirge deıin 2014 jylǵy 15-orynnan joǵary nátıjege qol jetkize alǵan joq.
Eske salsaq, 2022 jyly elimizdiń áıelder quramasy álem chempıonatynda 23-orynǵa turaqtady.
