Azııa chempıonaty: Qazaqstandyq 6 boksshy kelesi kezeńge ótti

NUR-SULTAN. QazAqparat - Bokstan Azııa chempıonatynda bizdiń elimizdiń boksshylary jankúıer senimin aqtap otyr. Búgin sharshy alań tórindegi alǵashqy jekpe-jegin ótkizgen 6 qazaqstandyq bylǵary qolǵap sheberi jarysty jalǵastyrýǵa múmkindik aldy, dep habarlaıdy QazAqparat tilshisi.

Budan buryn Qazaqstan quramasynyń 4 boksshysy qarsylastaryn jeńgenin habarlaǵan edik. Olardyń qatarynda Qaırat Erálıev (56 keli), Sanatálı Tóljanov (64 keli), Tursynbaı Qulahmet (75 keli) jáne Vasılıı Levıt (91 keli) bar. Endi jarysty jalǵastyratyn qazaqstandyq bylǵary qolǵap sheberleri qataryna Ánýar Muzapparov pen Qamshybek Qońqabaev qosyldy.

Ánýar Muzapparov 52 kelide el namysyn qorǵaıdy. Oǵan búgin Enkhmandah Hardýrdjý qarsylas atanǵan edi. Boksshymyz qarsylasyna syr bermeı, ony qapy qaldyrdy. Osylaısha jarystyń 1/8 fınaldyq satysyna joldama aldy.

Al Qamshybek Qońqabaev 91 keliden joǵary salmaqta Nepal elinen kelgen Ashıs Davadımen qolǵap túıistirdi. 2017 jyly álem chempıonatynda kúmis júlde alǵan sańlaǵymyz bul dúbirli dodada ózin jaqsy qyrynan tanytty. Osylaısha 1/8 jarystyń fınaldyq satysynan súrinbeı ótip, shırek fınalǵa joldama aldy. Aıta keteıik, Azııa chempıonatynda Qamshybek ulttyq quramanyń kapıtany retinde bastap bardy.

Bizdiń ulttyq qurama sapynan endi Temirtas Júsipov (49 keli), Zakır Safıýllın (60 keli), Aslanbek Shymbergenov (69 keli), Bek Nýrmaganbet (81 keli) sharshy alańǵa shyǵady.

Aıta keterligi, atalmysh chempıonatta elimizdiń jigitter quramasy barlyq salmaqta oıyn kórsetedi.

Azııa chempıonatynda qyzdar quramasy jarysty sátsiz bastady. Olardyń arasynan Sánııa Sultanqyzy (57 keli) jarystyń 1/16 fınaldyq satysynda Mıjgona Samadovadan (Tájikstan) jeńilip qaldy.