Azııa chempıonaty: Qazaqstan eskekshileri 3 altyn bir kúmis, bir qola medal jeńip aldy
ASTANA. QazAqparat - Ońtústik Koreıanyń Chondjý qalasynda ótip jatqan akademııalyq eskek esýden Azııa kýbogynda Qazaqstan sportshylary 3 altyn, 1 kúmis, 1 qola medal jeńip aldy, dep qabarlaıdy QazAqparat tilshisi QR UOK-niń baspasóz qyzmetine silteme jasap.
26 maýsymda bastalǵan kýbok básekesine Azııanyń aıtýly komandalary jınalǵan. Qazaqstan quramasynyń múshesi Aleksandra Opachanova altyn medal jeńip alsa, juptasyp óner kórsetýden Marııa Poıda men Alına Mochýlaǵa teń keler eshkim bolmady. Al erler arasynda juptasyp synǵa túsken Evgenıı Vasılev pen Mıhaıl Taskın qola júldeger atandy.
Al búgin, ıaǵnı 30 maýsym kúni Qazaqstan quramasy tórt adamdyq eskek esýden bir kúmis júlde jáne jekeleı eskek esýden úshinshi altyn júldeni jeńip aldy. Jekeleı synda Alına Mochýla altyn alsa, Marııa Poıda, Svetlana Germanovıch, Aleksandra Opachanova jáne Vıktorııa Chepıkovalar tórt adamdyq eskek esýde kúmis júldeger atandy.
Bas bapkerdiń aıtýynsha, Azııa Kýbogy Jazǵy Azııa oıyndarynyń aldyndaǵy eń úlken daıyndyq. Osy synda otandyq sportshylar men qarsylastardyń qarqyny belgili bolmaq.
«Alda Azııa oıyndary kele jatyr. Ol biz úshin bıylǵy jyldyń basty dodasy. Azııa oıyndarynda altynǵa talasý qıyn bolady, sebebi, Qytaı eń myqty komanda sanalady. Dese de, biz júlde alý úshin bar kúshimizdi salamyz», - deıdi bas bapker Anna Belonogova.
