Azııa chempıonaty: Ilıa Ilın besinshi oryndy qanaǵat tutty
NUR-SULTAN. QazAqparat - Qazaqstandyq aýyr atlet Ilıa Ilın Qytaıdyń Nınbo qalasynda ótip jatqan aýyr atletıkadan Azııa chempıonatynda besinshi oryndy qanaǵat tutty, dep habarlaıdy QazAqparat tilshisi.
Ilıa Ilın 96 keli salmaqta synǵa tústi. Ol qossaıystyń qorytyndysymen 345 kelini baǵyndyrdy. Nátıjesinde Ilıa bul kórsetkishimen besinshi orynnan árige asa alǵan joq.
Azııa chempıonatynda budan buryn jigitter arasynda úsh qazaqstandyq sportshy saıysqa tústi. Olardyń arasynan Arlı Chonteı (55 keli) men Denıs Ýlanov (81 keli) qola júldege qol sozdy. Al Farhad Harkı (67 keli) alǵashqy ondyqty qorytyndylady. 2016 jylǵy Olımpıada chempıony Nıjat Rahımov alǵan jaraqatyna baılanysty jarysqa shyqpady.
Ázirge qyzdar arasynda júldege eshkim ilikken joq. Zýlfııa Chınshanlo (55 keli) tórtinshi oryndy qanaǵat tutsa, Karına Gorıcheva (64 keli) besinshi oryn aldy.
