Azııa chempıonaty: Grek-rım kúresi sheberleri 7 medal jeńip aldy
NUR-SULTAN. QazAqparat - Qytaıdyń Sııan qalasynda kúres túrlerinen Azııa chempıonaty márege jetti, dep habarlaıdy QazAqparat tilshisi.
Birinshilikti grek-rım kúresi sheberleri támamdady.
Ulttyq olımpıada komıtetinen túsken málimetke qaraǵanda, Meıirjan Shermahanbet 67 kg salmaqta fınalǵa deıin erkin jetti. Tek sońǵy básekede ǵana eki márte álem chempıony, koreı balýany Rıý Han Sýǵa 1:5 esebimen ese jiberdi.
72 kg salmaqta qola júlde úshin kúresken Demeý Jadyraev ózbekstandyq Aram Vardanıandy utty.
Sondaı-aq 82 kg salmaqta Maqsat Erejepov taǵy bir ózbekstandyq Jalǵasbaı Berdimuratovty tize búktirdi.
Al 97 kg salmaqta qola júlde úshin kilemge shyqqan Álimhan Syzdyqov ırandyq Mahdı Abbas Alııarıfeızabadıdan jeńilip, medalsyz qaldy.
Osylaısha jarystyń sońǵy kúni Nurym Dúısenov bastaǵan mamandar baptap aparǵan grek-rım kúresi sheberleri 1 kúmis, 2 qola júldeni jeńip aldy. Keshegini qosqanda, qola medal sany altaýǵa jetti.
Eske sala keteıik, budan buryn Azııa chempıonatnynda tórt birdeı qazaq balýanynyń qola medal jeńip alǵanyn, búgin Meıirjan Shermahanbettiń fınalǵa shyqqanyn jazǵan bolatynbyz.
Odan buryn erkin kúres sheberleri sátti kúresip, qos birdeı altyn medalǵa ıe boldy.
Endi balýandarymyz Nur-Sultan qalasynda qyrkúıek aıynda ótetin álem chempıonatyna daıyndalatyn bolady.
