Azııa chempıonaty: Aýdaryspaqtan kil myqtylar anyqtaldy
NUR-SULTAN. QazAqparat - Almatyda Ulttyq at sportynan ótip jatqan І Azııa chempıonatynda aýdaryspaqtan kil myqtylar anyqtaldy, dep habarlaıdy QazAqparat tilshisi.
QR Ulttyq sport qaýymdastyǵy málim etkendeı, aýdaryspaq saıysynda 5 salmaq dárejesi boıynsha (50 kg, 60 kg, 70 kg, 80 kg, 80+ kg) 8 memleketten kelgen 27 sportshy júldeli oryndardy sarapqa saldy.
Atalǵan synda Qazaqstan, Mońǵolııa, Reseı elderinen bes-besten sportshy qatyssa, Qytaı, Ózbekstan jáne Aýǵanstannan úsh-úshten bilekti jigitter synǵa tústi. Al Tájikstan namysyn 2 sportshy qorǵap, Vengrııa elinen jalǵyz sportshy saıysqa tústi. Asa tartysty ótken saıysta 50 keli salmaqta bas júldeni jerlesimiz Amanjol Nurbek qanjyǵasyna baılasa, ekinshi oryndy Aýǵanstannan kelgen qonaǵymyz Karımı Masoýd jeńip aldy. Al úzdik úshtikti reseılik Akchalov Mırjan túıindedi.
60 keli salmaqta da jerlesterimizdiń mereıi ústem boldy. Bas júlde Quralbaı Ermekke buıyrdy, ekinshi orynǵa mońǵolııalyq Maǵaı Aıthabyl qol jetkizdi. Úshinshi oryn aýǵanstandyq Ansarı Abdýljalılge buıyrdy. 70 keli salmaqta qazaqstandyq Imanǵazyuly Narmaǵanbetke teń keler eshkim bolǵan joq. Ekinshi oryndy ózbekstandyq Solıev Mırzohıd jeńip alsa, úshinshi orynǵa Aýǵanstannan kelgen taǵy bir sportshy Safarı Nýrtaza ıe boldy.
80 keli salmaqtyń bas júldesin jerlesimiz Aǵabek Ǵabıt jeńip aldy. Ózbekstandyq Kývondıkov Sýnnatılla ekinshi, mońǵolııalyq Elik Ómirbek úshinshi orynǵa ıe boldy. Ókinishke qaraı, 80 keliden joǵary salmaqtyń bas júldesine talasqan jerlesimiz Janalın Ádiljan úshinshi oryndy mise tutty. Bas júlde Mońǵolııadan kelgen qandasymyzǵa buıyrsa, ekinshi oryndy tájikstandyq Egemberdıev Sırogıddın ıelendi.
Esterińizge sala keteıik, osyǵan deıin teńge ilý men jamby atý saıysynyń jeńimpazdary men júldegerlerin jarııalaǵan bolatynbyz.
Jastar jylyna oraı uıymdastyrylǵan birinshiliktiń jalpy júlde qory 16 mıllıon teńgeni quraıdy. Chempıonatty Almaty oblysy ákimdiginiń qoldaýymen QR Ulttyq sport qaýymdastyǵy ótkizip otyr. Atalǵan dodaǵa Azııanyń 10 elinen sportshylar qatysýda. Olar kókpar, aýdaryspaq, teńge ilý jáne jamby atý sportynan baq synaıdy. Jarys 21 sáýir kúni óz máresine jetedi.
