Azııa chempıonaty: Abylaıhan Júsipov fınalda nokdaýnǵa túsip, kúmisti qanaǵat tutty
ASTANA. QazAqparat - Tashkentte ótip jatqan Azııa chempıonatynda 69 keli salmaqta óner kórsetken qazaqstandyq bylǵary qolǵap sheberi Abylaıhan Júsipov aqtyq synda ózbek boksshysy Shahram Gııasovqa ese jiberdi.
Jekpe-jek «Qazsport» arnasynan kórsetildi.
Qos boksshy kezdesý bastalysymen bir-birin barlap jatpaı, birden urysty bastap ketti. Urymtal tusty paıdalanǵan alań ıesi birinshi raýnda Abylaıhanǵa qatty soqqysyn darytyp, nokdaýnǵa túsirdi. Osy sátte referı esep ashty.
Ekinshi raýnda jerlesimiz terezesi teń óner kórsetti, keı tustarda basymdyǵy da baıqalyp jatty. Alaıda úshinshi raýnda qarsylasy rıngte erkin oıqastap, aılasyn asyryp júrdi. Esep nátıjesinde úsh raýndta da ózbek boksshysy tolyq 30 upaıdan alǵany málim boldy - 3-0.
Aıta keteıik , osyǵan deıin Azııa chempıonatyna qatysqan qazaqstandyq on boksshynyń toǵyzy álem chempıonatyna lıtsenzııa alǵanyn habarlaǵan edik. Olar: Azamat Isaqulov (52 kelige deıin salmaq dárejesinde), Qaırat Eralıev (56 keli),Ádilet Qurmetov (60 keli), Bekdáýlet Ibragımov (64 keli), Abylaıhan Júsipov (69 keli), Ábilhan Amanqul (75 keli), Erik Áljanov (81 keli), Vasılıı Levıt (91 keli) jáne Qamshybek Qońqabaev (+91 keli).
Azııa chempıonatynyń irikteýinen ótpeı qalǵan jalǵyz boksshy - Erjan Jomart (49 keli): ol jartylaı fınalda ındonezııalyq Kornelıýs Kvangý Langtan utylyp qaldy.
Álem chempıonaty-2017 25 tamyz ben 3 qyrkúıek aralyǵynda Gambýrgte (Germanııa) ótedi.
