Azııa chempıonatynda 10 qazaqstandyq boksshy fınal joldamasyn sarapqa salady

ASTANA. KAZINFORM – Taıland koroldiginiń Chıangmaı qalasynda erler jáne áıelder arasynda bokstan ótip jatqan Azııa chempıonatynda jeksenbi kúni jartylaı fınalda 10 qazaqstandyq sportshy rıngke shyǵady.

Qazaqstan ýaqytymen saǵat 12.00-de bastalatyn dodada ekinshi jupta Sanjar Táshkenbaı óner kórsetedi.

Álem jáne Azııa chempıony S.Táshkenbaı 48 kelige deıingi salmaqta japonııalyq Kadzýma Aratakemen kezdesedi.

Budan eki jyl Iordanııa astanasy Amman qalasynda Sanjar dál osy boksshyny Azııa chempıonatynyń fınalynda jeńgen bolatyn.

Taǵy bir álem chempıony Mahmud Sabyrhan (54 kg) taılyq Saravýt Sýkthetti synap kóredi.
Orazbek Asylqulov (57kg) mońǵolııalyq Lýndaa Gantýmýrmen judyryqtasady.

Dýlat Bekbaýov (67 kg) tájikstandyq Shýkrat Salomatovpen qolǵap túıistiredi.

Abylaıhan Júsipov (71 kg) taǵy bir tájikstandyq Shohobjon Shýkýrovpen sheberlik baıqasady.

Dıas Moljigitovtiń (75 kg) qarsylasy – bıyl Azııa birinshiligine alǵash qatysyp jatqan Ýkraına ókili Pavel Ilıýsha. 

Erasyl Jaqpekov (80 kg) Ózbekstan ókili Týrabek Habıbýllaevpen betpe-bet keledi.

Álem chempıony Bekzat Nurdáýletov (86 kg) taǵy bir ýkraınalyq Danııl Jasanmen júzdesedi. 

Shırek fınalda ózbekstandyq qandasymyz Madııar Saıdrahımovty joldan taıdyrǵan Saǵyndyq Toǵambaı (92 kg) bul joly qytaılyq Taımıao Lıýdan aılasyn asyrýdy kózdeıdi.

Tartysty jekpe-jektiń biri asa aýyr salmaqta bolǵaly tur. Ulttyq qurama kapıtany Aıbek Oralbaı ózbekstandyq, eki dúrkin Olımpıada chempıony Bahodır Jalolovtyń izbasary delinetin Djahongır Zokırovpen kimniń myqty ekendigin anyqtaıdy.

Áıelder arasynda fınalǵa Qazaqstannan bes boksshy joldama aldy. 

Altyn úshin 10 jeltoqsan kúni qazaqstandyq qyzdar myna sportshylarmen talasady. 

60 kg. Vıktorııa Grafeeva — Tsıange Lı (Qytaı),

63 kg. Aıda Ábikeeva — Lınh Ha Thı (Vetnam),

70 kg. Natalıa Bogdanova — Baıson Manıkon (Taıland),

81 kg. Gúlsaıa Erjan — Karıne Aırapetıan (Ýkraına),

81+ kg. Eldana Talıpova — Oltınoı Sotımboeva (Ózbekstan).

Eske sala keteıik, budan buryn Natalıa Bogdanovanyń Azııa chempıonatynyń altynyna talasatynyn jazǵan bolatynbyz. 

Sondaı-aq Gúlsaıa Erjan ózbekstandyq qarsylasyn jeńip, fınalǵa shyqty.