Azııa chempıonaty: Qazaqstandyq 15 jasqa deıingi boksshylar 6 medal aldy

ASTANA. KAZINFORM — Iordanııa astanasy Amman qalasynda 15 jasqa deıingi jasóspirimder arasyndaǵy Azııa chempıonaty máresine jetti.

Qurlyqtyq doda World Boxing aıasynda alǵash ret ótti. Onda elimizdiń uldar jáne qyzdar quramalary barlyǵy 6 altyn medal aldy. Onyń 4-eýi uldarǵa buıyrsa, 2-eýi qyzdardyń enshisine tıdi.

Qurlyqtyq dodada uldarda Damır Janshılıkov (33 keli), Shyńǵys Ahmetov (49 keli), Nurbaqyt Tóregeldi (55 keli), Nurıslam Tashmaǵanbetov (70 keli) chempıondyq ataqqa qol jetkizdi. Al Birjan Jaqyp (37 keli), Qýanysh Halımbet (40 keli), Jandos Qalqanov (58 keli), Nurasyl Hasan (67 keli), Temirlan Kazyev (70 keli) kúmis júldege qol soqsa, Meıirjan Shádi (64 keli) úzdik úshtikti túıindedi.

Atalǵan quramanyń aǵa bapker mindetin Jaqsylyq Moldahanov atqarady. 

Al 15 jasqa deıingi qyzdar quramasy sapynan Aqerke Dalabaı (64 keli) men Jansaıa Erjan (70 keli) jeńis tuǵyryna kóterildi. Al Aıarý Ońǵarbek (33 keli), Ánel Ordabek (35 keli), Tomırıs Satybaldy (40 keli), Medına Abylqasym (46 keli), Madına Sapar (55 keli), Aılın Hodjamberdıeva (61 keli), Zıada Súıenaly (67 keli), Perızat Málik (70 keliden joǵary) kúmis júldeger bolsa, Dana Orazbekqyzy (37 keli), Aıarý Faızýllaeva (52 keli) men ıAsmın Djaýthanova (58 keli) qola medal aldy.

Olardy jarysqa aǵa bapker Aıbek Ábilda daıyndady.

Qurlyqtyq dodada 15 jasqa deıingi jasóspirimder quramalar arasynda altyn júlde sany jóninen Úndistan 11 medalmen kósh basynda tursa, odan keıingi orynda Ózbekstan — 7, Qazaqstan — 6, Ýkraına — 3, Túrkimenstan, Bahreın, Irak — 1 medalmen ornalasty.

Eske salsaq, budan buryn Reseıdegi týrnırde bokstan áıelder quramasy altyn júldesiz qaldy.