Azııa chempıonaty: Grek-rım kúresinen qazaqstandyq balýandar altynsyz qaıtty
ASTANA. KAZINFORM — Iordanııa astanasy Amman qalasynda grek-rım kúresinen Azııa chempıonaty máresine jetti. Qazaqstandyq balýandar 2 kúmis, 2 qola medal aldy.
El quramasynan Omar Sataev (82 keli) pen Álimhan Syzdyqov (130 keli) ekinshi orynǵa taban tirese, Ibragım Magomadov (77 keli) pen Shamıl Ojaev (87 keli) úzdik úshtikti túıindedi.
Jalpykomandalyq esepte upaı sany boıynsha Iran (201 upaı) kósh bastasa, odan keıingi oryndarda Ózbekstan (168), Japonııa (131), Qazaqstan (98 upaı) ornalasqan.
Aıta ketsek, altyn alǵan sportshyǵa 25 upaı, kúmiske 20, qolaǵa 15 ball esepteledi.
Byltyr Qyrǵyzstan astanasy Bishkekte ótken qurlyqtyq dodada grek-rım kúresiniń sheberleri 1 altyn, 2 kúmis, 1 qola oljalaǵan edi.
Endi qazaqstandyq balýandar áıelder kúresi men erkin kúresten el namysyn qorǵaıdy.