Azııa chempıonaty: Gandboldan Qazaqstan áıelder quramasy Ońtústik Koreıadan jeńilip qaldy

ASTANA. KAZINFORM - Gandboldan Qazaqstan áıelder quramasy Nıý-Delıde (Úndistan) ótip jatqan Azııa chempıonatynda ekinshi kezdesýinde Ońtústik Koreıaǵa ese jiberdi.

Búgingi qarsylasymyz osal emes. 1988, 1992 jyldary Olımpıada chempıony atansa, 1995 jyly álem chempıony tuǵyryna kóterildi. Al Azııa chempıonatynda 16 márte altynnan alqa taqty. 
Kezdesý barysynda qazaqstandyq gandbolshylar qarsylasyna 20:30 esebimen ese jiberdi.

Qazaqstandyq gandbolshylar A tobynda oıyn kórsetedi. Qarsylastary - Qytaı, Sıngapýr jáne Ońtústik Koreıa.
Alǵashqy týrda el quramasy Qytaıdy 28:26 esebimen tize búktirse, endi 6 jeltoqsanda olar Sıngapýrmen oınaıdy.

Al V tobynda Japonııa, Úndistan, Gonkong jáne Iran synǵa túsip jatyr.

Árbir toptan alǵashqy eki oryndaǵy quramalar pleı-off satysyna joldama alady. 
Gandboldan Qazaqstan áıelder quramasy 2002, 2010 jyldary Azııa chempıony ataǵyn jeńip alsa, 2021 jyly qola júldeger atandy.