Azııa boks konfederatsııasy 2018 jyldyń mańyzdy týrnırleriniń kúntizbesin usyndy

«2010 jyldan beri ótkizilip kele jatqan Jasóspirimder olımpıada oıyndary osy jyldyń mańyzdy oqıǵalarynyń biri bolmaq. Jazǵy oıyndar 2010 jáne 2014 jyly Azııada, Sıngapýrda jáne Qytaıda ótti. Olımpıada 2018 jyly 1-12 qazan aralyǵynda Argentınada ótedi. Osyǵan baılanysty eki irikteý sharasy uıymdastyrylyp, 19-28 sáýirde Taılandta jastar arasynda bokstan qurlyqtyq chempıonat ótedi. Tamyzda osy dáreje boıynsha álem chempıonaty josparlanǵan, onyń qaıda ótetinin Halyqaralyq áýesqoı boks qaýymdastyǵy (HÁBQ) anyqtap jatyr», - dedi konfederatsııanyń atqarýshy dırektory Baǵdáýlet Tórehanov.

Azıa oıyndary 18 tamyzdan 2 qyrkúıekke deıin Indonezııada ótpek. Qazaqstan bul jarysqa 1994 jyly alǵash ret qatysqan edi. Azııa oıyndary qarsańynda 10-17 aqpan kúnderi Indonezııada testilik jarystar uıymdastyrylady.

Bıyl Úndistan 28 qańtardan 1 aqpanǵa deıin «Indian Open» boks týrnırin ótkizedi. Sondaı-aq, dástúrli «Thailand Open», «China Open», «Ulanbaatar Cup» týrnıri men Atyraýda ótetin úsh qazaqstandyq is-shara josparda bar.

Qarashada Úndistanda áıelder arasynda bokstan álem chempıonaty ótedi. Onyń naqty kúnin halyqaralyq qaýymdastyq habarlaıtyn bolady.

«Bıyl kezekti jáne kezekten tys HÁBQ kongressteri ótetinin atap ótkim keledi. Taıaýda Rımde Uıymnyń atqarý komıtetiniń kezekten tys otyrysy bolady. Atalmysh sharalarǵa bizdiń konfederatsııanyń prezıdenti Serik Qonaqbaev qatysady», - dep túıindedi Baǵdáýlet Tórehanov.

Azııa boks konfederatsııasy Halyqaralyq áýesqoı boks qaýymdastyǵynyń (HÁBQ) bes qurlyqtyq qurylymdarynyń biri bolyp tabylady. 2014 jyldyń qarashasynan bul mekemeni HÁBQ vıtse-prezıdenti, tanymal boksshy Serik Qonaqbaev basqaryp keledi.

2017 jyldyń qorytyndysy boıynsha azııalyq boks álemde aldyńǵy orynǵa shyqty.