Azııa banki Qazaqstanǵa qarjy quıa ma: Quryltaı mańyzdy kelisimdi birinshi oqylymda qaraıdy
ASTANA. KAZINFORM — Qazaqstan ınfraqurylymyn damytýǵa jańa ınvestıtsııa tartýdyń múmkindigi keńeımek. Quryltaı depýtattary Azııa Infraqurylymdyq Investıtsııalar Bankimen áriptestik týraly negizdemelik kelisimdi ratıfıkatsııalaý týraly zań jobasyn birinshi oqylymda qaraıdy. Qujat kólik, energetıka, tsıfrlyq baılanys jáne basqa da mańyzdy salalardaǵy jobalardy qarjylandyrýǵa jol ashyp, bıýdjetke túsetin júktemeni azaıtýǵa baǵyttalǵan.
Quryltaı Spıkeri Aıbek Dádebaıdyń tóraǵalyǵymen ótken Bıýro otyrysynda aldaǵy otyrystyń kún tártibi belgilendi.
Kelisim ınfraqurylymdyq jobalardy qarjylandyrý quraldaryn keńeıtýge jáne neǵurlym shuǵyl jobalarǵa memleket shyǵystaryn qaıta bólý esebinen bıýdjetke túsetin júktemeni azaıtýǵa baǵyttalǵan. Sonymen qosa bul qujat qarjylandyrýdyń basym sektorlaryn aıqyndaýǵa, sondaı-aq jobalardy iske asyrý rásimderin ońtaılandyrýǵa tıis.
Kelisimdi ratıfıkatsııalaý Azııa Infraqurylymdyq Investıtsııalar Bankimen aradaǵy birlesken bastamalardy iske asyrýdyń tıimdiligin arttyrýǵa yqpal etedi. Bul rette, Qazaqstanǵa kólik, energetıka, tsıfrlyq baılanystar jáne ekonomıkanyń basqa da sektorlaryndaǵy jobalardy qarjylandyrý úshin uzaq merzimdi ınvestıtsııalar tartý múmkindgi beriledi.
Birinshi oqylymda 1959 jyly 20 sáýirde Strasbýrgte jasalǵan Qylmystyq ister boıynsha ózara quqyqtyq kómek týraly eýropalyq konventsııany ratıfıkatsııalaý týraly zań jobasy da qaralady. Konventsııaǵa qosylý Qazaqstanǵa elimizdiń quqyq qorǵaý organdarynyń óndirisindegi qylmystyq ister boıynsha dáleldemeler alýǵa jáne zańsyz jolmen alynǵan shetelge shyǵarylǵan aktıvterdi elge qaıtarýǵa múmkindik beredi. Bul qylmystyq isterdi, sonyń ishinde transulttyq qylmyspen baılanysty isterdi tergeýdiń jedeldigi men tıimdiligin arttyrady.
Bıýro sondaı-aq І shaqyrylǵan Qazaqstan Respýblıkasy Quryltaıynyń ókilettigin iske asyrýdyń birinshi sessııaǵa arnalǵan negizgi is-sharalar josparyn bekitti. Josparǵa eldiń áleýmettik-ekonomıkalyq damýyna, memlekettik qyzmetter kórsetý sapasyna, óńirlerdi damytýǵa, bıznesti, aýyl sharýashylyǵyn, ǵylym men tsıfrlandyrýdy qoldaýǵa, sondaı-aq azamattardyń qaýipsizdigi men quqyqtaryn qorǵaýǵa tikeleı baılanysty máseleler engizilip otyr.
Іs-sharalar josparynda Quryltaıdyń tyńdaýlary, Joǵary aýdıtorlyq palatanyń esepteri, «Úkimet saǵattary», komıtetterdiń kóshpeli otyrystary, «dóńgelek ústelder», komıtetterdiń taqyryptyq otyrystary, parlamentaralyq jáne halyqaralyq qyzmet sııaqty bólimder kiredi.
Sonymen qatar, Bıýro otyrysynda Qazaqstan Respýblıkasy Quryltaı Tóraǵasynyń janynan Depýtattyq ádep keńesin qurý týraly sheshim qabyldandy. Onyń quramyna Quryltaıdaǵy barlyq turaqty komıtetterdiń, sondaı-aq barlyq saıası partııalar fraktsııalarynyń ókilderi kirdi.
Aıta keteıik, Ulttyq qordyń taza valıýtalyq aktıvteri 2027 jyly 65,2 mlrd AQSh dollary deńgeıinde boljanyp otyr. Bul týraly Quryltaıda 2027–2029 jyldarǵa arnalǵan áleýmettik-ekonomıkalyq damý boljamyn tanystyrý kezinde Ulttyq ekonomıka birinshi vıtse-mınıstri Azamat Ámrın aıtty.
