«Azııa balalary» oıyndarynda Qazaqstan shorttrekshileri eki medal jeńip aldy

ORAL. QazAqparat – Reseıdiń Kemerovo qalasynda qysqy sport túrlerinen ótip jatqan «Azııa balalary» oıyndarynda qazaqstandyq shorttrekshiler eki medal jeńip aldy, dep habarlaıdy QazAqparat tilshisi.

BQO dene shynyqtyrý jáne sport basqarmasynan málim etkenindeı, 1500 metrlik qashyqtyqta batysqazaqstandyq sportshylar Meıirjan Tólegen kúmis, Málıka Joltabar qola júldege qol jetkizdi.

Meıirjan Seıilbekuly 2008 jyldyń 26 maýsymynda Oral qalasynda dúnıege kelgen. №40 orta mektepte oqyp júrip, short-trek sportymen jattyqtyrýshy Erhat Qubashevtyń qol astynda jattyǵa bastaǵan. Short-trekten el chempıony, QR sport sheberi.

Málıka Járdemqyzy 2008 jyldyń 13 naýryzynda Oral qalasynda dúnıege kelgen. Qaladaǵy №25 orta mektepte bilim alǵan. Short-trekten Qazaqstan chempıonatynyń júldegeri, QR sport sheberligine úmitker.

Ekeýi de búginde Oralǵa qarasty Derkól kentinde ornalasqan olımpıada rezervi oblystyq mamandandyrylǵan mektep-ınternat-kolledjiniń 9-synybynda oqyp jatyr. Olardy Erhat Qubashev, Danabek Haırov, Maksım Lozovoı bastaǵan bapkerler Oral qalasyndaǵy muz aıdyny sport saraıynda jattyqtyrady.

Eske sala keteıik, budan buryn qysqy sport túrlerinen «Azııa balalary» oıyndary bastalǵanyn jazǵan bolatynbyz.