«Azııa balalary» oıyndary: qazaqstandyq shorttrekshiler estafetada 2 júlde aldy
ASTANA. QazAqparat – Reseıdiń Kemerovo qalasynda qysqy sport túrlerinen ótip jatqan «Azııa balalary» oıyndarynda qazaqstandyq short-trekshiler estafetada 2 júlde aldy, dep habarlaıdy QazAqparat tilshisi.
Short-trekten BQO quramasynyń aǵa bapkeri, Qazaqstannyń eńbek sińirgen jattyqtyrýshysy Maksım Lozovoıdyń málim etkenindeı, qazaqstandyq qyzdar 3 myń metrlik estafetada qola júldege ıe boldy.
Qazaqstan quramasy sapynda Málıka Joltabar, Aısara Labıb (ekeýi de – BQO), Nurııa Alpysbaı, Aızada Altynbek (ekeýi de – Astana), Sofııa Sımakova (Rýdnyı) óner kórsetti.
Sodan keıin bozbalalar 3 myń metrlik estafetada máre syzyǵyn ekinshi bolyp qıdy.
Munda Meıirjan Tólegen, Álibı Álimgereev, Erasyl Shyńǵyshan, Sanjar Bekejan, Madııar Madıhov (bári de – Batys Qazaqstan oblysynan) el namysyn qorǵady.
Sóıtip, shorttrekshiler búgin 1 kúmis, 1 qola júldege qol jetkizdi. Keshe 1500 metr qashyqtyqta batysqazaqstandyqtar Meıirjan Tólegen kúmis, Málıka Joltabar qola júldeger atanǵan edi.
«Erteń «Azııa balalarynda» short-trekshiler 1 myń metr qashyqtyqta synǵa túsedi», dedi QazAqparat tilshisine M.Lozovoı.
Eske sala keteıik, budan buryn «Azııa balalary» oıyndarynda Qazaqstan shorttrekshileriniń eki medal jeńip alǵanyn jazǵan bolatynbyz.
Sondaı-aq «Azııa balalary» oıyndarynda Qazaqstan qorjynyna taǵy 2 medal tústi.
