«Azııa balalary» oıyndary: Astanalyq sportshysy «kúmis» oljalady

Ksenııa Shevchýk Olımpıadalyq rezerv daıyndaý ortalyǵynyń jáne №2 mamandandyrylǵan balalar-jasóspirimder sport mektebiniń shákirti.

Oıyndardy uıymdastyrýshylar shańǵy jarysynyń baǵdarlamasyna jańa saıys túrin - «dostyq» estafetasyn engizgen. Onda komandalar kompıýterdiń kómegimen jerebe tastaý arqyly ártúrli qatysýshy-komandalardyń ókilinen qurylady.

«Estafetada barlyǵy 20 jasaq básekege tústi. Ár kezeńde sportshylar 3 shaqyrym baǵyndyrdy. Ksenııa ekinshi kezeńge tústi. Ol estafetany Sibir federaldy okrýgynyń sportshysy Valerııa Smolıchten qabyldap aldy. V.Smolıch birinshi estafetada 09 mınýt 56 sekýnd kórsetkishpen kósh bastady. Ekinshi kezeńdi baǵyndyrýǵa elordalyq sportshy 11 mınýt 35 sekýnd jumsaǵan. Estafetany Sahalın oblysynyń shańǵyshysy Marııa Kolomıets aıaqtady. Onyń ýaqyty - 11 mınýt 16 sekýnd. Estafetanyń erejesine sáıkes, jarys qorytyndysy ár komandanyń qatysýshylarynyń qashyqtyqty baǵyndyrýǵa jumsalǵan eń az ýaqyty boıynsha shyǵaryldy. Ksenııa, Marııa jáne Valerııa, jalpy alǵanda, 32 mınýt 48 sekýndta jarysty aıaqtady», - delingen basqarma habarlamasynda.

Atalǵan sportshylar Polına Mılýzova (Sibir Federaldy Okrýgy), Darıa Morozova (Sahalın oblysy) jáne Anna Karpetstiń (Qıyr shyǵys Federaldyokrýgy) komandasynan 16 sekýndqa qalyp qoıǵan. Qola júlde Qazaqstan Respýblıkasynyń ókili Aısha Rakıshevaǵa (10 mınýt 20 sekýnd) máskeýlik Marııa Lıamınaǵa (10 mınýt 47 sekýnd) jáne Sahalın oblysynyń sportshysy Anastasııa Tkachenkoǵa (11 mınýt 54 sekýnd) buıyrdy.

Eske sala keteıik, budan buryn qazaqstandyq shorttrekshilerdiń «Azııa balalarynda» altyn jáne kúmis júldeni jeńip alǵanyn jazǵan bolatynbyz.

Sonymen qatar buǵan deıin jas bıatlonshy Vadım Kýrales bir altyn, bir qola, al Arına Sheshýkova kúmis medaldi óńirine taqqan edi.

17 aqpanda márege jetetin «Azııa balalary» oıyndarynda jasy 16-dan aspaǵan sportshylar óner kórsetýde.