«Azııa Avtonyń» óndiristik qýatyn aýyl sharýashylyǵy tehnıkasyn shyǵarýǵa baǵyttaý qajet — Májilis depýtaty

ASTANA. KAZINFORM — «Azııa Avto» kompanııasynyń óndiristik qýattaryn aýyl sharýashylyǵy nemese ózge de tehnıkany shyǵarýǵa baǵyttaý qajet. Mundaı usynysty búgin Májilistiń jalpy otyrysynda Úkimet basshysynyń atyna saýal joldaǵan depýtat Serik Erýbaev jasady.

— Damyǵan ulttyq avtomobıl ónerkásibi, ındýstrııalyq turǵydan órkendegen jáne tehnologııalyq jaǵynan básekege qabiletti memlekettiń aıqyn markeri bolyp sanalady. Táýelsizdik jyldary Qazaqstan óz avtomobıl óndirisin qalyptastyrýǵa birneshe ret talpynys jasady. Alaıda, bul baǵyttaǵy nátıjeler sońǵy jyldarǵa deıin kórsetilgen memlekettik qoldaýdyń kólemine saı kelmeı otyr. Onyń eń kórnekti mysaldardyń biri — Óskemendegi «Azııa Avto» jobasy men ındýstrııalyq alańǵa qatysty qalyptasqan jaǵdaı. Kóp jyldar boıy atalǵan kásiporyn salyqtyq jeńildikter, kedendik preferentsııalar jáne ındýstrııalyq sýbsıdııalar sııaqty eleýli memlekettik qoldaý alyp keldi. Ashyq derekkózderge sáıkes, memlekettik qoldaýdyń jalpy kólemi júzdegen mıllıard teńgege baǵalanǵan. Degenmen, kompanııa naqty ónerkásiptik lokalızatsııaǵa kóshpedi, tolyqqandy tereń qaıta óńdeý zaýytyn salý boıynsha mindettemelerin oryndamady jáne is júzinde uzaq ýaqyt boıy tek «otvertkalyq» qurastyrýmen shekteldi, — dedi depýtat.

Onyń dereginshe, «Azııa Avto» kompanııasyna komponentterdi ımporttaý kezinde 75 mlrd teńge, daıyn ónimdi ótkizý kezinde 122 mlrd teńge qosymsha qun salyǵynan, 99 mlrd teńge keden tólemderinen bosatylǵan. Sonymen qatar kádege jaratýdan 65 mlrd teńge ıemdengen. Osylaısha, barlyq jeńildik men preferentsııalardyń jalpy kólemi 361 mlrd teńgeni quraǵan.

— Alaıda, memleket ne josparlanǵan óndiristik qýattardy, ne kútilgen tehnologııalyq áser, ne jergilikti jetkizýshilerdiń tolyqqandy ekojúıesin jasaı almady. «Azııa Avtonyń» jaǵdaıy jańa ındýstrıaldy jobalardy júzege asyrý kezinde osyndaı qatelikterdiń qaıtalanýyn boldyrmaıtyn mańyzdy jáne óte qymbat sabaq retinde qarastyrylýy tıis. Bir kezderi «Azııa Avto» jobasy eń joǵary deńgeıdegi memlekettik delegatsııalardyń qatysýymen zor saltanatpen ashylǵan bolatyn. Qajetti ınfraqurylym da tolyqtaı jasaldy. Qazirgi ýaqytta osy paıdalanylmaı turǵan qýattardyń, ýaqyt óte kele tozyǵy shyǵatyny anyq. Mundaıǵa jol bermeı, olardy tıimdi paıdalaný qajet dep sanaımyz, — dedi ol.

Májilismen qazirgi ýaqytta Qazaqstanda birneshe avtomobıl óndiris jobalary júzege asyrylyp jatqanyna nazar aýdartady.

— Atap ótsek, Qostanaıdaǵy kópbrendtik «AllurAuto» klasteri men Almatydaǵy «Hyundai Trans Kazakhstan» zaýyty. Olar tek avtokomplektterdi jınaýmen shektelmeı, qosalqy bólshekter óndirisin de júzege asyrýda. Osyǵan baılanysty, «Azııa Avto» kompanııasynyń áli de óndiristik qýattaryn atalǵan jobalardy damytý úshin paıdalaný boıynsha usynystar ázirleý, ne olardy aýyl sharýashylyǵy nemese ózge de tehnıkany shyǵarýǵa baǵyttaý qajet ekenin atap ótemiz. Bul naryqta másele tek óndiristik bazada ǵana emes. «Azııa Avto» zaýytynda bir kezderi myńdaǵan jergilikti qyzmetkerler men bilikti kadrlar eńbek etti. Olardyń daǵdylaryn aldaǵy ýaqytta joǵary tehnologııalyq óndiriste paıdalaný áldeqaıda tıimdi bolar edi, — dedi Serik Erýbaev.

Depýtat Óskemendegi «Azııa Avto» kompanııasynyń óndiristik bazalary men ınfraqurylymyn ári qaraı damytýǵa arnalǵan baǵdarlamalyq qujattarǵa engizý máselesin pysyqtaý qajet dep sanaıdy.

— Bul jumystyń negizgi maqsaty — atalǵan óndiristik aktıvterdi saqtap qalý jáne olardy avtomobılder, aýyl sharýashylyǵy tehnıkalary, ózge de mashına jasaý ónimderi men qosalqy bólshekter óndirisinde odan ári paıdalaný bolýy tıis. Mundaı bastama Óskemen qalasynyń tek shıkizat nemese metall óndiretin óńir emes, daıyn ónim shyǵaratyn taǵy da bir jańa ındýstrııalyq ortalyqqa aınalýyna aıtarlyqtaı yqpal eter edi, — dedi ol.

Buǵan deıin «Azııa Avto» kompanııasynyń burynǵy basshysy syrttaı 9 jylǵa bas bostandyǵynan aıyrylǵanyn jazǵan edik.