Azııa álemdik tehnologııa naryǵyndaǵy ornyn nyǵaıtyp keledi
ASTANA. KAZINFORM — Shyǵys jáne Ońtústik-Shyǵys Azııa elderi jasandy ıntellekt pen jartylaı ótkizgishterge suranystyń artýyna baılanysty joǵary tehnologııalyq ónimderdiń jahandyq jetkizý tizbegindegi ornyn nyǵaıtyp keledi. Bul týraly Kazinform agenttigi Jiji Press basylymyna silteme jasap habarlady.
Aımaq halyqaralyq tehnologııalyq kompanııalardy tartyp, derekterdi óńdeý ınfraqurylymyn damytyp, osy salaǵa qajetti mamandar daıarlaýdy keńeıtip jatyr. Bul úderisterge Japonııa da qatysyp, aımaq elderimen tehnologııa jáne bilim berý salalaryndaǵy yntymaqtastyqty damytyp keledi.
Bul ózgeristerge áser etip otyrǵan faktorlardyń biri — AQSh pen Qytaı arasyndaǵy saýda-ekonomıkalyq qaıshylyqtardyń kúsheıýine baılanysty óndiris oryndary men jetkizý tizbegin ártaraptandyrý. Kompanııalar jekelegen naryqtarǵa táýeldilikti azaıtyp, óndiris geografııasyn keńeıtýge umtylýda. Bul rette Ońtústik-Shyǵys Azııa elderine de basymdyq berilip otyr.
Malaızııanyń Djohor shtaty derekterdi óńdeý ınfraqurylymyn damytatyn mańyzdy ortalyqtardyń birine aınalyp keledi. Munda Microsoft, Nvidia jáne NTT Data sııaqty iri halyqaralyq kompanııalar óz qyzmetin keńeıtip jatyr.
NTT Data jalpy qýaty 290 megavatt bolatyn derekterdi óńdeý ortalyqtarynyń keshenin salyp jatyr. Onyń alǵashqy nysanyn 2027 jylǵy sáýirde paıdalanýǵa berý josparlanǵan. Mundaı ortalyqtardyń kóbeıýine jasandy ıntellekt júıeleriniń esepteý qýatyna degen suranystyń artýy sebep bolyp otyr.
Vetnam da halyqaralyq jartylaı ótkizgishter naryǵyndaǵy rólin kúsheıtip keledi. AQSh-tyń Intel kompanııasy óndiristik operatsııalarynyń bir bóligin Kosta-Rıkadaǵy kásipornynan Hoshımındegi alańǵa kóshirýdi josparlap otyr. Al Ońtústik Koreıanyń Samsung Electronics kompanııasy Vetnamda jad mıkroshemalaryn óndirý, synaqtan ótkizý jáne qaptaý jumystaryn damytyp jatyr.
Jańa jobaǵa bastapqyda 1,5 mlrd dollar ınvestıtsııa salý kózdelgen. Kásiporyn 2027 jylǵy qarashada jumysyn bastaýy múmkin.
Sonymen qatar joǵary tehnologııalyq salalarǵa qajetti mamandar daıarlaýdyń mańyzy artyp keledi. Vetnam 2030 jylǵa deıin jartylaı ótkizgishter salasynda 50 myń maman daıarlaýdy maqsat etip otyr. 2025 jylǵy qazanda Vetnam-Japonııa ýnıversıtetinde osy baǵyt boıynsha arnaıy bilim berý baǵdarlamasy iske qosyldy.
Japonııanyń mamandar daıarlaý isine qatysýy aımaqtyń tehnologııalyq áleýetin arttyrýda halyqaralyq yntymaqtastyqtyń mańyzy zor ekenin kórsetedi.
Buǵan deıin Qazaqstan bilim berýde Ortalyq jáne Ońtústik Azııada kósh bastaǵanyn jazǵanbyz.
