Ázirge Qazaqstannyń 5 óńiriniń bastaýysh synyp oqýshylary ǵana tegin tamaqtandyrylýda
ASTANA. QazAqparat - Qazaqstannyń bes óńiriniń orta mektepterinde 1-4 synyp oqýshylary tegin tamaqtandyrylýda. Bul týraly QR bilim jáne ǵylym mınıstriniń orynbasary Esenǵazy Imanǵalıev málimdedi.
Onyń aıtýynsha 2014 jyly 29 qańtarda «Qazaqstan Respýblıkasynyń keıbir zańnamalyq aktilerine memlekettik satyp alý máseleleri boıynsha ózgerister men tolyqtyrýlar engizi týraly» QR Zańy kúshine endi. Onda qabyldanǵan jańa erejeler men qaǵıdalar 2014 jyldyń 1 maýsymynda kúshine enetin bolady.
Jańa zańǵa sáıkes, endi basqa óńirlerdiń jergilikti atqarýshy organdary jergilikti bıýdjet arqyly óz óńirlerindegi orta mektep oqýshylaryn tegin tamaqtandyrý joldaryn qarastyratyn bolady.
Ázirge tek bes óńirde, ıaǵnı Almaty, Astana qalalary jáne Atyraý, Aqtóbe jáne Batys Qazaqstan oblystarynyń orta mektepterinde 1-4 synyp oqýshylary kúnine bir mezgil túste tegin tamaqtandyrylyp jatyr. Bir balaǵa jumsalatyn qarjy orta eseppen 300 teńge.
