«Áziret Sultan» meshitine respýblıkalyq «Bas meshit» degen aıryqsha mártebe berildi
Bul týraly búgin juma namazynda «Áziret Sultan» meshitiniń Bas ımamy, naıb múftı Serikbaı qajy Oraz málim etti.
«Qazaqstan musylmandary dinı basqarmasynyń Almatyda ótken májilisinde «Áziret Sultan» meshitine respýblıkalyq «Bas meshit» degen aıryqsha mártebe berý týraly sheshim qabyldanyp, Bas múftı Erjan qajy Malǵajyulynyń buıryǵy shyqty. Osy sheshimdi qabyldaýǵa qoldaý bildirgen barsha dinı qaýymǵa, din qaıratkerlerine rızashylyǵymdy bildiremin. Meshitimizde kóptegen respýblıkalyq is-sharalar, ǵylymı konferentsııalar, semınarlar, qaıyrymdylyq aktsııalar ótip turady. Meshit elimizge tanymal, bedeldi teologtardyń, din qaıratkerleriniń, oblystardaǵy bas ımamdardyń ortaq minberine aınaldy. Meshit janyndaǵy «Hıkmet» teleradıostýdııasy elimizdiń aqparattyq rýhanı-aǵartý salasynda ózindik qoltańbasy qalyptasyp, jamaǵattyń aýdıo, vıdeo ýaǵyzdarǵa degen suranysyn qanaǵattandyryp keledi. Sondaı-aq elimizge kelgen sheteldik týrıster, delegatsııalar meshitimizge jıi bas suǵady. Qazaqstannyń túrli aımaqtarynan kelip zııarat jasaýshardyń da qarasy kóp. Láıim, Alla berekesin bersin! Juma múbarak bolsyn!», dedi bas ımam.
«Áziret Sultan» 2012 jyldyń 6 maýsymynda Elbasy Nursultan Nazarbaevtyń qatysýymen ashyldy. Kólemi men kórkemdigi jaǵynan Ortalyq Azııada teńdesi joq meshit, elimizge resmı saparmen keletin sheteldik memleketterdiń iri tulǵalarynyń arnaıy zııarat etetin Qazaqstandaǵy eń kórikti ǵımarattardyń tizimine engen.
