«Áziret Sultan» meshitindegi alǵashqy taraýıh namazy oqyldy (FOTO)
ASTANA. QazAqparat - Búgin «Áziret Sultan» meshitinde alǵashqy taraýıh namazy oqyldy, dep habarlady www.muslim.kz.
Qasıetti aımen saǵyna qaýyshqan elorda jurtshylyǵy búgin qulshylyq ordalaryna aǵyldy desek te bolǵandaı. Meshitke jıylǵan 6 000-nan astam jamaǵatqa QMDB-nyń naıb múftıi, «Áziret Sultan» meshitiniń bas ımamy Serikbaı Oraz Satybaldyuly qasıetti aıdyń qadiri týraly ýaǵyz aıtyp, bıylǵy jyly Quran Kárimdi hatym etetin qarılardy tanystyryp ótti.
Elordamyzdyń eńseli meshitinde bıylǵy ramazan aıynda qasıetti Quran Kárimdi elimizdiń tórt úzdik qarılary hatym etetin bolady. Olardyń biri bıylǵy respýblıkalyq Quran saıysynda top jaryp, temir tulpardy qanjyǵalaǵan Dýlat Bolatbekuly bolsa, «Áziret Sultan» meshitiniń naıb ımamy Ǵazız Ahmetov pen ál-Azhar ýnıversıtetinde bilim alyp jatqan ıAhııa Sansyzbaıulymen meshit jamaǵaty baıaǵydan tanys. Al, tórtinshi qarı retinde Almaty qalasyndaǵy «Ásker ata» meshitiniń ustazy ári azanshysy Ismanov Alımhan shaqyrylyp otyr.
Bir aıta keterligi, taraýıh namazyna kelýshilerdiń sany jyldan-jyldan artyp kele jatqany baıqalady. Bıylǵy jylǵy alǵashqy taraýıh namazyna 6 000-nan astam jamaǵat jıyldy. Namazdan soń kelýshilerdi Astana qalasy ákimshiliginiń demeýshiligimen iske qosylǵan tegin avtobýstar tasymaldaýdy bastap ketti.
Esterińizge sala keteıik, «Áziret Sultan» meshitinde úsh baǵyt boıynsha tórt avtobýs taraýıh namazynan soń tegin tasymaldaıtyn bolady.
