«Áziret Sultan» meshitinde zamanaýı standarttarǵa saı stýdııa ashyldy
ASTANA. 28 qazan. QazAqparat - Tusaýy kesilgenine nebári bir jyl tolǵan Astana qalasyndaǵy «Áziret Sultan» meshiti kóptegen irgeli sharalarǵa muryndyq bolyp, kópshiliktiń yqylasyna bólenip kele jatqany málim.
Elimizde qalyptasqan dinı ahýaldy jaqsartýdyń birden bir joly - dinı úgit-nasıhat ekeni kópten aıtylyp kelgen. Osy maqsatta «Áziret Sultan» meshitinde aýdıo jáne tele stýdııa ashyldy. Stýdııanyń qurylǵylary men bólshekteri Reseı, Amerıka Qurama shtattarynan arnaıy tapsyryspen aldyryldy.
Halyqty asyl dinimizge danalyqpen, tereń bilimmen shaqyrýǵa bastama bolsyn degen nıetpen bul stýdııaǵa «Hıkmet» degen at qoıyldy. Bul stýdııada ázirlengen ún taspalar men beıneónimder búkil Qazaqstan halqynyń durys dinı saýatyn ashýǵa mol úles qosylady dep kútilýde. «Hıkmette» ázirlengen dinı baǵdarlamalar birinshi kezekte memlekettik telearnalarda jáne arnaıy ashylyp jatqan «HIKMET.TV» ınternet portalynda kórsetiledi dep josparlanýda. Bul týraly muslim.kz habarlady.
