«Áziret Sultan» meshitinde Qadir túnin ótkizýge on myńnan astam adam jınaldy

Jaratýshy Iemiz bul túnde jasalǵan qulshylyqty myń aıda jasalǵan ǵıbadattan artyq dep qabyldaǵan. Qadir túni - Paıǵambarymyz Muhammedtiń (s.a.ý.) úmmetinen basqa eshbir úmmetke berilmegen Allanyń syıy. Sondyqtan bolsa kerek, ashylý saltanatyna Elbasynyń ózi qatysqan TMD-daǵy eń eńseli de sáýletti sanalatyn Elordamyzdyń «jaýharyna» aınalǵan «Áziret Sultan» meshitine Qadir túnin kútýge 10 myńnan astam adam jınaldy. Olardyń arasynda ıslamdy ómir salty sanaıtyn namazhan jamaǵat ta, dástúrli dinine moıyn burǵan jastar da, elimizdiń birqatar zııaly qaýym, buqaralyq aqparat quraldary ókilderi men memlekettik sheneýnikter de bar.

Jınalǵan qaýym - «Áziret Sultan» meshitiniń jamaǵaty myń aıdan da artyq bul túndi ǵıbrat pen ǵıbadatqa toly ótkizdi. Meshitte eń áýeli quptan jáne taraýyq namazdary oqyldy, nasıhat aıtyldy.

Budan soń «Áziret Sultan» meshitiniń bas ımamy Qaırat Joldybaıuly jamaǵatty Qadir túnimen quttyqtaı kele, aılardyń sultany, ýaqyttyń eń kıelisi - Ramazan aıynda jáne onyń qasıetti túni - Qadir túninde qylǵan qulshylyqtary men jasaǵan minájattaryn Alla qabyl etsin dep tiledi. Bas ımam eń áýeli jamaǵatqa Qadir túniniń qadirin túsindirdi. «Bul túni adamzatqa aq jol kórsetýshi, eki dúnıede baqytty etýshi, Alla Taǵalanyń pármeni, kıeli de qasıetti kitap - Quran Kárim tústi. Basqa kúnderi qansha ǵıbadat qylsań da, óz esebimen esepteledi, al bul túndegi qulshylyq 83 jyl 4 aıǵa para par ǵıbadatqa teńeledi. Alla Taǵala bul túndi aqyrzaman úmmetine, Paıǵambarymyz Muhammed Mustafa (s.a.ý.) jamaǵatyna tabys etti. Mundaı nyǵmet basqa eshbir úmmette bolmaǵan», - degen Qaırat Joldybaıuly jamaǵattan Otanymyz Qazaqstannyń tynyshtyǵy, halyqtyń birligi, dinı tózimdilik, ulttyń tutastyǵy sııaqty baılyǵyn tileýdi ótindi.

Ol sondaı-aq, Ramazan aıynda qanshama musylmandardyń, kásipkerlerdiń meshit arqyly qaıyrymdylyq jasap, saýapqa kenelgenin de jetkizdi. Imam sóz arasynda kásipkerlerdiń jumyldyrylýymen jáne jamaǵattyń sadaqasymen meshitte Ramazan aıy boıy 12 myńnan astam adamǵa aýyzashar berilgenin tilge tıek etip ótti.