Áziret Sultan meshiti uıymdastyrǵan «Tekti sózdiń tóresi - terme» atty jyr báıgesi máresine jetti
ASTANA. 10 aqpan. QazAqparat - Osydan biraz buryn Qazaqstan Musylmandary Dinı Basqarmasy men Astanadaǵy Áziret Sultan meshitiniń muryndyq bolýymen qolǵa alynǵan respýblıkalyq «Tekti sózdiń tóresi - terme» atty jyr báıgesi óz máresine jetti. Keshe elordanyń «Kongress-Holl» saraıynda jyr saıysyn qorytyndylaýdyń saltanatty keshi ótip, onyń barysynda úzdik tanylǵan termeler oryndalyp, júldegerler marapattaldy.
Saltanat qurylǵan keshtiń shymyldyǵyn Qazaqstan Musylmandary Dinı Basqarmasynyń tóraǵasy, Bas múftı, sheıh Ábsattar Qajy Derbisáli ashty. Bas múftı Táýelsizdiktiń arqasynda terme óneri de halyq arasynda óz tuǵyryna kóterilip kele jatqanyn aıta kele, alaıda, terme jazý shyǵarmashylyǵy toqyrap qalǵandyqtan, teleradıohabarlar barysynda jańa jazylǵan termeler emes, kóbine burynǵy, el aýzynda júrgen termeler ǵana oryndalyp júr dedi. «Mine, Táýelsizdik alǵaly beri birinshi ret uıymdastyrylyp otyrǵan bul jańa terme báıgesi osynysymen qundy. ıAǵnı, tól ónerimizdi qaıta jańǵyrtyp, olqylyǵymyzdyń ornyn toltyrýymen erekshe», - dep osynaý báıgeniń mán-mańyzyn atap ótti.
Sonymen qatar, kesh qonaǵy qoǵam qaıratkeri, Qazaqstannyń eńbek sińirgen ártisi, Memlekettik syılyqtyń ıegeri, ánshi-jyraý Bekbolat Tileýhan «qonaq kádesin» tartý etti.
Toqtala ketetin jaıt, jarııalanǵan respýblıkalyq báıge qorjynyna jalpy sany 290 terme kelip túsken eken. Jyr dodasyna qarapaıym el azamattarynan bastap, halyqqa tanymal aqyndarymyzǵa deıin qatysypty. Qazylar alqasy túsken termelerdi saralap, saraptap, úzdik termelerdi iriktep, júldegerlerdi anyqtady.
Nátıjesinde Bas júlde - avtomobıl kiltin - Respýblıkalyq aqyndar aıtysynyń júldegeri, aqyn Arman Berdalın ıelendi. Buǵan deıin jyr súıer qaýymǵa «Araq pen Qazaq» atty termesi arqyly jaqsy tanylǵan Arman Berdalınniń «Joq izdep júrmin» atty jańa termesin halyq zor yqylaspen qabyldady. Al birinshi oryn «Nur» Qazaq-Egıpet Islam mádenıeti ýnıversıtetiniń 2 kýrs stýdenti Roman Burqashtyń «Kishkentaı» termesine buıyrdy. Ony Qurmanǵazy atyndaǵy Qazaq ulttyq konservatorııasynyń túlegi Danııar Súleımen oryndaǵan bolatyn. 2-oryndy aıtysker aqyn Erkebulan Qaınazarov pen Jazýshylar odaǵynyń múshesi, memlekettik «Daryn» jastar syılyǵynyń ıegeri, aqyn Qalqaman Sarınniń «Ata-ananyń qadiri» atty termesi ıelendi. Úshinshi oryndy úsh termeshi enshiledi. Atap aıtsaq, Jaqyp Spataevtyń oryndaýyndaǵy Bekmurat Anarbaevtyń «Ata-anańdy qadirle tirisinde» termesi, aqyn, mádenıet qaıratkeri Serik Qalıevtiń «Ósıet aıttym urpaqqa» atty termesi jáne Qazaqstan Jazýshylar odaǵynyń múshesi, aqyn Juma-Nazar Somjúrektiń termesi júldeli orynnan tabyldy.
Budan bólek, «Úzdik maqam», «Úzdik oryndaýshy» atalymdary boıynsha aqshalaı syılyqtar tabys etildi. Erekshe atap ótetin másele yntalandyrý syılyǵy termeshiler báıgesine túsken 13 adamǵa buıyryp, olarǵa Ýmra qajylyǵyna joldama tabys etildi.
