«Áziret Sultan» meshiti saýat ashý kýrsyn bastaıdy
ASTANA. 30 tamyz. QazAqparat - «Áziret Sultan» meshiti saýat ashý kýrsyn bastamaq.
QMDB málimetterine qaraǵanda, dárister er adamdarǵa da, áıel adamdarǵa da ótkiziledi. Qazaq jáne orys tilinde júredi. Qazirgi ýaqytta saýat ashý kýrsyna jazylý júrip jatyr. Kýrsqa meshitte jazylýǵa bolady.
Esteńizge sala keteıik, bıylǵy 6 shildede Memleket basshysy Nursultan Nazarbaev Astana qalasy kúni merekesi aıasynda elordadaǵy Bas meshit - «Áziret Sultan» meshitin ashty.
Elordadaǵy Beıbitshilik jáne kelisim saraıy, Táýelsizdik saraıy jáne «Qazaq eli» monýmentiniń janynan boı kótergen meshitke bir mezgilde 5 myń adamǵa deıin, al musylman merekelerinde 10 myń adamǵa deıin namaz oqı alady.
«Áziret Sultan» meshiti qazirgi álemdik sáýlet óneriniń barlyq talaptaryna saı. Tamasha sáýlet kesheni negizgi ǵımarattardan jáne oǵan jalǵasqan vestıbıýldi bólmelerden turady. Shatyrdyń sáýleti klassıkalyq úlgidegi jalpy aýdany 6 myń sharshymetrdi quraıtyn kóp deńgeıli kúrdeli qurylys bolyp tabylady. Shatyrda dıametrleri 10,45 metrge teń 4 kúmbez jáne dıametrleri 7,3 metrge teń 4 kúmbez ornatqan. Meshittiń 4 munarasynyń árbiriniń bıiktigi 77 metr. Bas kúmbezdiń bıiktigi 51 metr, dıametri 28 metr. Bul Qazaqstandaǵy eń úlken meshit kúmbezi bolyp sanalady.
Meshitte ǵıbadathanalar, neke qııý rásimin ótkizýge arnalǵan bólmeler, Quran oqýǵa arnalǵan zaldar, meshit qyzmetkerlerine arnalǵan kabınetter, kitaphana, jalpy sany 130 adamǵa arnalǵan 5 dárishana bar.
