«Áziret Sultan» meshiti qymbat «temir tulpar» tigip, jyr-terme báıgesin uıymdastyrady
ASTANA. 16 tamyz. QazAqparat - «Áziret Sultan» meshiti Ramazan aıynan keıin jyr-terme báıgesin uıymdastyrady. Bas báıgege qymbat «temir tulpar» tigilmek. Bul týraly meshittiń ımamy Qaırat Joldybaıuly málim etti.
«Qazaq halqy Islam dinin árqashan óziniń ónerimen sabaqtastyryp, dástúrimen ushtastyra bilgen halyq. Óziniń urpaǵyna, bala-shaǵasyna nasıhatty maqal-máteldermen, jyr-dastan, hıkaıalarymen, termelermen jetkize bilgen. Qazaqqa jaı sózden góri óleń-termeler jaqynyraq. Qazaqtyń jyr-termeleriniń barlyǵy úgit-nasıhat. Ókinishke qaraı, sońǵy ýaqyttarda jyr-terme óneri kenjelep qaldy. Burynǵy termeler aıtylyp júrgenimen, jańa termeler joqtyń qasy», - deıdi ımam jýrnalıstermen ótken brıfıng barysynda.
Osyndaı olqylyqtardy toltyrý maqsatynda meshit ujymy terme oryndaýshylary men ondaı termeniń sózin jazýshylar arasynda báıge jarııalap otyr. «Báıge júldesiniń aldy «temir tulpar» bolmaq. Termeniń qorytyndy keshi Astanadaǵy úlken bir saltanatty saraıda atalyp ótedi», - dedi Qaırat Joldybaıuly.
