«Áziret Sultan» meshiti qaıyrymdylyq sharasyn ótkizdi
ASTANA. 24 tamyz. QazAqparat - Búgin Astanadaǵy «Áziret Sultan» meshiti áleýmettik turmys jaǵdaıy tómen, kópbalaly otbasylarǵa, jetim-jesirlerge, naýqas, sondaı-aq múmkindigi shekteýli múgedek jandarǵa qaıyrymdylyq kómegin berdi.
Bul týraly elordanyń bas meshiiniń baspasóz qyzmeti habarlady.
«Islam dini jaǵdaıy bar azamattardy qoǵamdaǵy ártúrli taǵdyrymen qaıyrymdylyqqa muqtaj bolǵan kisilerge, qoǵam múshelerine kómektesýge, qol ushyn berýge, járdemdesýge shaqyrady. Paıǵambarymyz da (s.ǵ.s.) óziniń bir hadısinde: «Ózi toq jatyp, kórshisi ash jatqan adam bizden emes», - degen. Sondaı-aq, Quran Kárimniń birqatar aıattary da jurtqa sadaqa berýge, kómektesýge, qol ushyn sozýǵa, tamaqtandyrýǵa shaqyrady». Osylaı degen «Áziret Sultan» meshitiniń bas ımamy Qaırat Joldybaıuly meshittiń uıymdastyryp otyrǵan bul qaıyrymdylyǵy da osy ósıetterdiń aıasynda ekenin túsindirdi.
Qasıetti Ramazan aıynda meshitten kómek suraǵan muqtaj jandardan 50-den astam ótinish kelip túsken edi. Onyń basym kópshiligi densaýlyǵyna qatysty kómek suraǵan adamdar. Meshit ishinen qurylǵan aqyldastar alqasy ótinishterdi jiti tekserip, asa muqtaj dep tanylǵan 47 ótinishtiń ıesine 2,5 mıllıon teńge mólsherinde qaıyrymdylyq jasaýdy uıǵardy. Aılardyń sultany - Qasıetti Ramazan aıy - rahymdylyq aıy bolǵandyqtan muqtaj jandar bul kúnderden erekshe qaıyrymdylyq kútetini sózsiz. Al bul aıda jasalatyn qaıyrymdylyqtyń saýaby sansyz. Sol úshin de jurt dál osy myń aıdan da qaıyrly aıda mal-múlkinen muqtaj jandardyń úlesin berip, pitir sadaqa qylady. Qaıyrymdylyq halyqtyń Ramazan aıy boıy bergen osy pitir sadaqasynyń esebinen boldy.
Árkimniń muqtajdyǵyna baılanysty 100 myń teńgege deıin qarjylaı qaıyrymdylyq jasaldy. Buǵan qosa, azyq-túlik pen muqtaj jandardyń ımanyn kúsheıtetin, ómirdiń taýqymetine sabyr etýge shaqyratyn, jigerin janıtyn, rýhyn qanattandyratyn dinı ádebıetter de qosa berildi.
Qaırat Joldybaıuly meshittiń qaıyrymdylyq sharalary áli de jalǵasatynyn aıtty. «Aldymyzda Qurban aıt keledi. Biz soǵan oraı aktsııa ótkizýdi josparlap otyrmyz. ıAǵnı, kásipkerlerdiń basyn qosyp, qaladaǵy, aýdan-aýyldardaǵy muqtaj adamdarǵa qurbandyqqa shalynǵan maldyń etin taratatyn bolamyz», - dedi bas ımam. Sondaı-aq, ımam jaǵdaıy tómen otbasylardan shyqqan 100-den astam oqýshylarǵa «Áziret Sultan» meshiti mektep kıimderi men mektepke qajetti zattaryn alyp berýdi uıymdastyryp jatqanyn jetkizdi.
Qaıyrymdylyqqa qoly jetken jandar pitir sadaqa qylǵan jurttarǵa, qaıyrymdylyq qylǵan kásipkerlerge jáne osylardyń bárin uıymdastyryp, úlestirip otyrǵan meshit ujymdaryna alǵystaryn aıtyp, Allanyń razylyǵyn tiledi.
Aqnurly Saǵynǵalıeva:
- Qyzym kúıip qalyp, alty aı boıy júre almaı qalǵan edi. Kómek surap meshitke keldim. Meshittiń bas ımamy Qaırat Joldybaıuly «qara zıre maıyn jaqsańyz qalaı bolady» dep keńes berdi. Allaǵa sansyz shúkir aıtamyn, sol zıreden kúıiktiń izi de qalmady. Endi mine, qarjylaı da kómek qolyn sozyp jatyr. Alla rıza bolsyn!
Kúlmárııa Boranbaeva:
- Sińlimniń osy Astanaǵa kelip aıaq-qoly sal bolyp qaldy. Turaqty tirkeýi joq bolǵandyqtan esh jerge aýrýhanaǵa almaı qoıdy. Al ózim qaterli isikke shaldyqqanmyn. Allanyń qalaýymen namazǵa jyǵylyp bes jyldyń ishinde bul aýrýdan jazylyp shyqtym. Búginde osyndaı halimizdi túsinip, qaıyrymdylyq kórsetip otyrǵan jurtqa, meshit ujymyna rızashylyǵym sheksiz. Qashan kelsem de meshit qyzmetkerleri joǵary shyǵaryp, janyńa jylý beretin, jigerlendiretin sózder aıtyp shyǵaryp salady. Osynyń ózi men úshin úlken qaıyrymdylyq boldy.
