«Áziret Sultan» meshiti din taqyrybyndaǵy maqalalarǵa báıge jarııalady
ASTANA. 3 tamyz. QazAqparat - Astana qalasyndaǵy «Áziret Sultan» meshiti Islam dininiń asyl qundylyqtaryn ǵylymmen, zaman jáne qoǵam talabymen, ulttyq rýhanı bastaýlarymyzben ushtastyra qalam terbeıtin qarymdy qalamgerlerdiń erkin taqyryptaǵy rýhanı, tanymdyq, dinı maqalalaryna respýblıkalyq báıge jarııalaıdy.
Bul týraly atalǵan meshittiń www.muslim.kz resmı saıtynan habarlandy.
Báıge talaptary: maqala qazaq nemese orys tilinde jazylýy tıis; Usynylǵan maqala 14 qarpimen terilgende, A4 formatyndaǵy 5 betten aspaýǵa tıis; Qoldanylǵan jaǵdaıda Quran aıattary men paıdalanylǵan ádebıetterdiń siltemeleri kórsetilýi kerek; Maqalanyń elektrondy nusqasy men qatysýshy týraly málimet (tolyq aty-jóni, telefon nómiri, meken-jaıy, qyzmeti) 2012 jyldyń qazan aıynyń 1 juldyzyna deıin hazratsultan@gmail.com elektrondy poshtasyna jiberilýi shart.
Qorjynǵa túsken maqalalar meshittiń Muslim.kz portalynda jarııalanyp otyrady.
Báıge júldeleri:
Bas báıge - 200 000 teńge;
І oryn - 150 000 teńge;
ІІ oryn - 75 000 teńgeden (2 adamǵa);
ІІІ oryn - 50 000 teńgeden (3 adamǵa);
Yntalandyrý syılyqtary - 20 000 teńgeden (5 adamǵa).
