«Áziret Sultan» meshiti BAQ ókilderine aýyzashar berdi

Aýyzashar barysynda eń áýeli aqsham namazyna azan shaqyrylyp, Quran oqyldy. Sodan soń «Áziret Sultan» meshitiniń bas ımamy, naıb múftı Serikbaı qajy Oraz sóz alyp, orazanyń mańyzy, aýyzashardyń artyqshylyǵy týraly birazyraq ýaǵyz aıtty. Sonymen qatar, bas ımam BAQ ókilderiniń din isterindegi róline toqtalyp, Haqty tanytý jolyndaǵy jýrnalıster jumysyna jemis tiledi.

Aýyzashar barysynda izgi nıetterin, ıgi tilekterin bildirgisi kelgen jýrnalıster de sóz alyp, «Áziret Sultan» meshitiniń ıgi isterine rızashylyq bildirdi.

Kesh barysynda dinı ánder shyrqalyp, termeler de tógildi. Bunymen qosa, Áziret Sultan meshitiniń resmı saıty muslim.kz óziniń «Estimeıtinder de estıdi» atty jańa paraqshasynyń tusaýyn kesti. Atalǵan paraqsha múmkindigi shekteýli jandardyń arasynda mylqaýlar máselesine den qoıyp, olardyń asyl dinimizge barynsha jaqyndaýyna múmkindik týǵyzbaq. Joǵary kásibı sýrdoaýdarmashylar qoǵamnyń bir bólshegi sanalatyn estý jáne sóıleý qabiletinen aıyrylǵandar úshin dinı ýaǵyzdardy barynsha túsiniktirek etpek. «Ásili, qulaqpen ǵana estıdi degenimiz durys emes, haq dindi júrekpen estýge de bolady. Al biz tek osy jaǵdaıdyń dánekeri bolýǵa nıettimiz», - deıdi ınternet paraqshany uıymdastyrýshylar. Olardyń sózine qaraǵanda, múmkindigi shekteýli osyndaı jandar negizinen tıimdi quraldyń bolmaýynan kóptegen jat aǵymnyń jetegine ketip jatyr. Atalǵan paraqshany ashýdaǵy maqsattyń biri de soǵan tosqaýyl qoıý bolyp tabylady.

Aýyzashar sońynda qonaqtarǵa kádesyı usynylyp, jýrnalıster jaqsy kóńilmen tarqasty.