«Áziret Sultan» meshiti 300-den astam balany mektepke daıyndady
ASTANA. 4 tamyz. QazAqparat - Astanadaǵy «Áziret Sultan» meshiti Qasıetti Ramazan aıynda áleýmettik jaǵdaıy tómen, kópbalaly otbasylardyń balalaryn mektepke daıyndaý aktsııasyn jarııalap, qaıyrymdy jandardy osynaý sharaǵa úles qosýǵa shaqyrǵan bolatyn.
Osyǵan baılanysty Qadir túni qarsańynda «Áziret Sultan» meshiti aktsııaǵa at salysqan jandardyń esebinen 300-den astam balanyń mektep kıimderi men mektepke qajetti quraldaryn (kóılek, kostıým-shalbar, aıaq kıim, sporttyq kıim, sómke jáne mektepke qajetti qalam-dápterler) tabystady.
«Áziret Sultan» meshitiniń bas ımamy Qaırat Joldybaıulynyń aıtýynsha, bıylǵy Ramazan aıynda Qazaqstan musylmandary dinı basqarmasynyń uıymdastyrýymen oblystardaǵy ortalyq meshitterdiń barlyǵy kóp balaly otbasylardyń balalaryn mektepke daıyndaý aktsııasyn qolǵa alǵan. Sonyń aıasynda «Áziret Sultan» meshiti de dinimizge janashyr azamattardyń basyn qosyp, kóp balaly, áleýmettik jaǵdaıy tómen otbasylardyń 300-deı balasyn mektepke daıyndap úlgerdi.
«Biz balalarǵa mektepke qajetti formalaryn, sport kıimderin, aıaq kıimderin, sómkelerin, qalam-dápterin, basqa da qural-jabdyqtaryn alyp berip otyrmyz. Bunyń barlyǵy dinge janashyr kásipkerlerdiń úles qosýymen júzege asqan ıgi shara. Sharanyń maqsaty - osyndaı sharapaty mol raqym aıynda bizdiń bolashaǵymyz, keleshegimiz jas búldirshinderdiń júrekterine qýanysh syılaý. Qaıyrymdylyq aktsııasy kásipkerler esebinen júzege asqanyn taǵy bir márte aıtqym keledi. Qudaı qalasa, aktsııa ár jyl saıyn uıymdastyrylady», - deıdi Q. Joldybaıuly.
