«Áziret Sultan» meshiti 25 iri qarany qurbandyqqa shalyp, etin elorda mańyndaǵy eldi mekenderdiń muqtaj adamdaryna taratady

 Bul týraly búgin atalǵan meshittiń bas ımamy Qaırat Joldybaıuly aıtty.

«Biz bıyl Qurban aıtty basqa aıttardan erekshe atap ótip otyrǵan jaıymyz bar. ıAǵnı «Áziret Sultan» meshiti Qazaqstan musylmandary dinı basqarmasynyń «Zeket» qorymen birigip, «Rabbyn úshin namyz oqy, qurban shal» degen aktsııa ótkizip jatyrmyz»,-dedi ol.

Onyń atap ótýinshe, aktsııanyń maqsaty qurbandyqqa shalynǵan maldyń etin Astana tóńiregindegi eldi mekenderde turatyn muqtaj adamdarǵa taratyp berý. Óıtkeni, bul kúnderi myńdaǵan adam qurbandyq shalyp, etin balalar men qarttar úıine beredi. Al, olardyń sany az, ári munsha mol etti qabyldaı almaıdy.

«Sondyqtan bıyl «Áziret Sultan» meshiti Astana qalasynyń aınalasyndaǵy eldi mekenderdegi muqtaj kisilerge úıdi-úıdi aralap, et taratýdy josparlap otyr. Qudaı qalasa, aıttyń ekinshi kúni osy elorda mańyndaǵy «Altyn taǵa» bazarynda «Áziret sultan» meshiti aktsııaǵa qatysýshy jamaǵattyń atynan 25 iri qarany qurbandyqqa shalyp, aıttyń úshinshi kúni muqtaj kisilerge azyq-túlik dinı kitaptarmen qosa taratatyn bolamyz»,-deıdi meshittiń bas ımamy.