Ázirbaıjanda parlament saılaýy ótti
BAKÝ. 8 qarasha. QazAqparat /Arnur Muhametkárim/ - Keshe, jergilikti saǵat 19.00-de Ázirbaıjanda parlamenttik saılaýǵa daýys berý aıaqtaldy.
Ortalyq saılaý komıssııasy janyndaǵy «Saılaý» aqparattyq ortalyǵy habarlaǵandaı, saılaýshylardyń daýys berýge kelýi 50,14 paıyzdy qurady. Ázirbaıjanda daýys berý quqyǵyna 4 946 588 adam ıe. Saılaýǵa qatysý úshin Mıllı medjlıstiń 4-inshi shaqyrylymyna 473 úmitker tirkeldi, olardyń 53-i óz kandıdatýralaryn alyp tastady. 125 depýtattyq mandat úshin 690 úmitker talasty.
Parlamenttik saılaýda halyqaralyq baıqaýshylar arasynda QR OSK tóraǵasy Qýandyq Turǵanqulov bastaǵan qazaqstandyq delegatsııa da boldy.
