Ázirbaıjan Mámbetovtiń týǵanyna 80 jyl toldy
ALMATY. 25 qarasha. QazAqparat - Keshe Almatyda KSRO halyq ártisi, Memlekettik syılyqtyń ıegeri, Halyq qaharmany Ázirbaıjan Mámbetovtiń týǵanyna 80 jyl tolýyna baılanysty eske alý keshi ótti.
Qazaqtyń memlekettik Muhtar Áýezov atyndaǵy akademııalyq drama teatrynda bolǵan bul shara Á. Mádıulynyń óner ordasynda ári jyldary sahnalaǵan birqatar qoıylymdarynyń úzindilerinen quralǵan kórsetilimmen bastaldy.
"Osy úzindilerden-aq, Mámbetov oıynyń bıiktigin, rejısserlik armanshyldyǵyn, patrıottyǵyn, sezimtaldyǵyn, fılosof ekendigin baıqaýǵa bolady. Ańyraǵan ana, kómýsiz jer izdegen temirjolshy, mahabbat sazyna eltigen Qaragóz ben Syrym qanshama dúnıe aıtyp jatyr. Osynyń bári Ázekeńniń balalary, fılosofııalyq tujyrymy, ómirge degen kózqarasy, jalpy adamzattyq bolmysy, bıik rejısserlik parasaty dep uǵam", - deıdi Qazaqstannyń halyq ártisi Esmuhan Obaev. Qazaqtyń memlekettik Muhtar Áýezov atyndaǵy akademııalyq drama teatry dırektory jáne kórkemdik jetekshisiniń aıtýynsha, bul óner ordasyna 30 jyl ǵumyryn bergen Á.Mámbetov kúlli qazaqtyń kásibı rejıssýrasyn dúnıege pash etken, máńgi ulttyq bolmysqa boı aldyrǵan shoqtyǵy bıik, kósem rejısser. Teatr áıgili óner qaıratkeriniń 80 jyldyǵyna oraı naýryz aıynda dástúrli teatr festıvalin Ázirbaıjan Mádıulyna arnaǵan bolatyn. Mereıtoılyq sharalar jaqynda Oralda halyqaralyq teatr festıvaline ulasyp, Temirbek Júrgenov atyndaǵy qazaq ulttyq óner akademııasynda "Uly rejısser, qaıratker, professor Á.Mámbetovtiń kórkemdik álemi" dep atalatyn ǵylymı-tájirıbelik konferentsııamen jalǵasyp otyr. Endi búgin, 25 qarashada "Keńsaı-1" zıratyndaǵy eskertkishine gúl qoıylmaq.
