Azımova: Konstıtýtsııa mátinin Braıl shrıftimen basyp shyǵarý – «Ádiletti Qazaqstan» kórinisi
ASTANA. KAZINFORM – Búgin Konstıtýtsııalyq Sot tuńǵysh ret Braıl shrıftimen memlekettik jáne orys tilinde basylyp shyqqan QR Konstıtýtsııasynyń tusaýkeserin ótkizdi. Konstıtýtsııalyq Sottyń tóraǵasy Elvıra Azımova bul mańyzdy qadam «Ádiletti Qazaqstan» tujyrymdamasyna sáıkes keletinin jetkizdi.
Onyń aıtýynsha, qoljetimdi ortany qurý barlyq qazaqstandyqtardyń zań aldyndaǵy teńdigi men sot tóreligine qol jetkizýiniń konstıtýtsııalyq kepildikteriniń negizin quraıdy.
– «Ádiletti Qazaqstan» saıasaty memlekettiń adam quqyqtary men bostandyǵyn qamtamasyz etýge múddeli. Konstıtýtsııalyq Sot óz jumysynda Konstıtýtsııaǵa jáne Adam quqyqtarynyń jalpyǵa birdeı deklaratsııasyna sáıkes árbir adam úshin teńdik, qadir-qasıet jáne ádildik qaǵıdatyn ilgeriletýge basa mán beredi. Konstıtýtsııa mátinin Braıl shrıftimen basyp shyǵarý – bul bizdiń osy saıasatty ilgeriletýge qosqan úlesimiz, – dedi E. Azımova.
EQYU-nyń Astanadaǵy baǵdarlamalar keńsesiniń basshysy Folker Frobart Qazaqstan Konstıtýtsııasynyń mátinin Braıl shrıftimen basyp shyǵarǵan Konstıtýtsııalyq Sottyń quqyq qorǵaý qundylyqtaryna jáne aqparatqa ortaq qoljetimdilikti qamtamasyz etýge ınklıýzıvti kózqarasyn oń baǵalady.
Braıl álipbıimen shyǵarylǵan Konstıtýtsııa mátininiń basylymdary 56 mekemege, sonyń ishinde respýblıkalyq jáne aımaqtyq kitaphanalarǵa, oqý ortalyqtary men mamandandyrylǵan mektepterge taratylmaq.
Dúnıejúzilik densaýlyq saqtaý uıymynyń derekterine sáıkes Qazaqstanda kórý qabileti buzylǵan 160 myń adam turady eken. Eńbek jáne halyqty áleýmettik qorǵaý mınıstrliginiń derekteri boıynsha Qazaqstanda 85 myń zaǵıp adam tirkelgen.
Búgin elimizde Qazaqstannyń Konstıtýtsııasy alǵash ret Braıl álipbıinde jaryq kórgenin jazǵan bolatynbyz.
