Ázil-syqaqshylardyń respýblıkalyq baıqaýy ótti
QYZYLORDA. QazAqparat-Qyzylorda oblysynyń Shıeli aýdanynda 1 sáýir - Halyqaralyq kúlki kúnine oraı «Tamasha» oıyn-saýyq otaýynyń tarlany Meıirman Nurekeevtiń esimine arnalǵan respýblıkalyq baıqaý ótti, dep habarlady QazAqparat HAA tilshisi.
Shara barysynda aýdan ákimi Qaıratbek Áýbákiruly qazaq satırasyna eleýli úles qosqan talantty akterdiń óner joly men shyǵarmashylyǵyn eske alyp, «Tamasha» tarlanynyń esimin ulyqtaý, sondaı-aq búgingi jastar arasynda satıra ónerine degen oń kózqarasty qalyptastyrý maqsatynda uıymdastyrylǵan baıqaý qatysýshylaryna sáttilik tiledi.
Satırık, Qazaqstan Respýblıkasynyń eńbek sińirgen qaıratkeri Kópen Ámirbek qazylar alqasyna tóraǵalyq etti.
Baıqaýǵa Qyzylorda, Ońtústik Qazaqstan, Aqtóbe jáne Jambyl oblystarynan barlyǵy 9 ázil-syqaq otaýy qatysyp, óz ónerlerin kórsetti.
Satıra keshiniń qorytyndysy boıynsha, bas júldeni Qarmaqshy aýdanynan kelgen «Dýman» halyqtyq ázil-syqaq otaýy, I oryndy Jambyl oblysynyń «Kúlki shańyraq» halyqtyq ázil-syqaq otaýy, II oryndy Qyzylorda qalasynyń «Mereke dýman» halyqtyq ázil-syqaq otaýy, III oryndy Shıeli aýdany «Qytyq» ázil-syqaq otaýy ıelendi. Olarǵa aýdan ákiminiń alǵys hattary men aqshalaı syılyqtar tabystaldy.
