Azyq-túliktiń álemdik baǵasy ósip keledi
ASTANA. KAZINFORM — Álemde ınflıatsııalyq qysym kúsheıep keledi. Bul týraly elordada ótken brıfıngide Ulttyq bank tóraǵasy Tımýr Súleımenov málim etti.
- Syrtqy proınflıatsııalyq táýekelder kúsheıdi. Taıaý Shyǵystaǵy shıelenistiń toqtamaýy álemde ınflıatsııalyq qysymdy kúsheıtip, taýar men qarjy naryqtaryndaǵy qubylmalylyqty eselep tur. Osy jaǵdaıda Eýropa Ortalyq banki men Federaldy rezerv júıesin qosa alǵanda, birqatar jetekshi ortalyq bankter aqsha-kredıt saıasatyn qatańdatýǵa kóshti, - dedi T. Súleımenov.
Onyń aıtýynsha, azyq-túliktiń álemdik baǵasy ósip keledi. Qyrkúıek aıynda FAO azyq-túlik baǵasynyń ındeksi bir aıda 1,5 paıyzǵa jáne jyldyq mánde 5,8 paıyzǵa ósti. Astyq, ósimdik maıy men qant baǵasynyń da óskeni baıqaldy. Al ettiń álemdik baǵasy birshama tómendedi.
- Qyrkúıekte Reseıdegi ınflıatsııa 6,4% boldy. Reseı Banki ornyqty ınflıatsııalyq qysym kúsheıgenin atap ótti. Osy jaǵdaıda retteýshi qyrkúıek aıynda aqsha-kredıt saıasatyn iske asyrýda saqtyqty ustanyp, negizgi mólsherlemeni 14% deńgeıinde qaldyrdy. Eýropa odaǵynda ınflıatsııa qyrkúıek aıynda energııa kózderine baǵa ósken tusta 3,8%-ke deıin jedeldedi. Inflıatsııalyq qysymnyń kúsheıýine baılanysty Eýropa Ortalyq banki qyrkúıek aıynda paıyzdyq mólsherlemeni 25 bazalyq tarmaqqa kóterip, ınflıatsııany 2% nysanaly dálizge qaıtarý kerek degen ustanymyn rastady. AQSh-ta da ınflıatsııa 3,7 paıyzǵa deıin jedeldedi. Energııa kózderi, sonyń ishinde eń aldymen benzın baǵasynyń ósýi aıtarlyqtaı úles qosty. Qyrkúıekte AQSh Federaldy rezervtik júıesi ınflıatsııalyq qysymdy odan ári tejeý qajet ekenin atap ótip, mólsherlemeni 25 bazalyq tarmaqqa kóterdi, - dedi UB basshysy.
Onyń sózine qaraǵanda, álemdik munaı naryǵynda jaǵdaı belgisiz kúıde qalyp otyr. Brent markaly munaıdyń 1 barreli 100 AQSh dollarynan joǵary deńgeıde qalyptasty.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
