Azyq-túliktiń 11 túrine baǵanyń eń tómengi deńgeıi engizilmek — Saýda jáne ıntegratsııa mınıstrligi
ASTANA. KAZINFORM — Saýda jáne ıntegratsııa mınıstrliginiń saıtynda kúnbaǵys maıy, un, taýyq jumyrtqasy, araq jáne t. b. 11 taýar túrine baǵanyń eń tómengi deńgeıin engizý týraly aqparatty jarııalandy. Munyń mánin vedomstvodan túsindirip berdi.
Mınıstrliktiń málimetinshe, baǵanyń eń tómengi deńgeıi (BTD) taýarlardyń kóterme jáne bólshek baǵasyna áser etpeıdi. BTD ımport kezinde salyqtardy esepteý kezinde ǵana qoldanylady. BTD — bul taýarlardy ımporttaý kezinde QQS tóleýden bas tartýǵa jol bermeýge arnalǵan mehanızm.
— BTD ımporttaýshy málimdegen baǵa men jergilikti óndirýshilerdiń baǵasy arasyndaǵy ortasha mán retinde esepteledi. Bul mán tek taýarlardy ımporttaý kezinde QQS somasyn esepteý úshin qoldanylady. 2025 jyldyń 1 shildesiden bastap BTD engiziletin 11 taýardyń tizbesi 2024 jylǵy qazanda bekitilgen jáne BTD qoldaný qaǵıdalaryna sáıkes toqsan saıyn jańartylyp otyrady. Toqsan saıynǵy jańartý qajettiligi keıbir taýarlar baǵasynyń maýsymdylyǵyna jáne ımport baǵasynyń qubylmalylyǵyna baılanysty, — dep túsindirdi mınıstrlikten.
BTD tetigi salyq organdarynyń bastamasy boıynsha 2021 jyly qabyldandy jáne 2022 jyldyń 1 shildesiden bastap qoldanylyp keledi.
Salyq organdary taýarlardy ekstremaldy tómen baǵamen ákelý jaǵdaılaryn tirkegen jaǵdaılarda BTD tetigine júginedi. Mysaly, 2023 jyly naryqtyq baǵamen tonnasyna 120-140 myń teńgeden bolǵan jaǵdaıda bıdaıdy tonnasyna 9 myń teńgeden ákeldi, 2024 jyly kúnbaǵys maıyn ortasha naryqtyq baǵasy Qazaqstanda lıtrine 814 teńgeden bolǵanda lıtrine 275 teńgeden tómen baǵamen ákeldi, al 2025 jyly almanyń naryqtyq baǵasy kg úshin 500 teńge bolǵanda 9 teńgeden, shujyq — kg úshin 695 teńge (shamamen 3,5 myń teńge) ákelindi.Mundaı qun ımport kezinde tólenýi qajet QQS somalarynyń aıtarlyqtaı tómendeýine ákeledi.
Saýda jáne ıntegratsııa mınıstrligi baǵanyń eń tómengi deńgeıiniń jarııalanǵan ólshemderi bizdiń elde satylatyn taýarlardyń bólshek nemese kóterme baǵasy emes ekenin taǵy da atap ótti.
Buǵan deıin habarlanǵandaı, saýda ústemesin asyryp qosqan kásipkerler jaýapkershilikke tartyldy.