Azyq-túlikti jetkizý qyzmeti qalaı jumys isteıdi – fotoreportaj
ASTANA. KAZINFORM – Onlaın-jetkizý baǵyty boıynsha Qazaqstan álemdik trendter qatarynda tur. Azyq-túlikti úıge aldyrtý da osy qatarda. Máselen, URTG zertteý uıymy 2024 jyly júrgizgen saýalnamaǵa sáıkes, respondentterdiń 70%-dan astamy azyq-túlik jetkizý servısterin keminde bir ret paıdalanǵanyn aıtqan. 2023 jyly bul kórsetkish 54%-dy quraǵan edi.
Qyzmet kórsetýshi kompanııalardyń biri – ıAndeks Go qoldanbasyndaǵy Lavka qyzmeti. KAZINFORM osy servıstiń Almatydaǵy darkstorynda bolyp, oqyrmandarǵa sholý usynyp otyr.
Darkstor – tutynýshylarǵa arnalǵan azyq-túlikti saqtaıtyn, jınaıtyn jáne kýrerge tabystaıtyn arnaıy oryn. Mundaı darkstorlar qalanyń túrli núktesinde ornalasqan, osynyń arqasynda tapsyrys barynsha jyldam jetkiziledi.
Lavka darkstorlarynda azyq-túlik suryptaýdan bólek, tapsyrysqa kofe qaınatyp, daıyn taǵamdy ystyqtaı ázirlep jetkizý múmkindigi de bar. Munda ıAndeks Lavkanyń naqty bólimshesinde isteıtin qyzmetkerler ǵana bas suǵa alady. Ol qyzmetkerlerdiń medıtsınalyq kitapshasy bolýǵa mindetti. Darkstordyń ádettegi sýpermarketten basty aıyrmashylyǵy osynda. Dúkenge kez kelgen tutynýshy kire alsa, darkstordyń azyq-túlik turǵan aımaǵyna tipti kýrer de kire almaıdy. Olar kútý aımaǵynda tapsyrys tizimindegi taýardyń jınaqtalýyn kútedi.
Azyq-túlikti jınap beretin maman kýrerdiń qolyndaǵy tizimdi kútip turmaıdy. ıAndeks Go qoldanbasyndaǵy berilgen tapsyrys eń áýeli derekterdi jınaý termınalyna túsedi. Osydan keıin 2 mınýtqa jetpeıtin ýaqyttyń ishinde jınaqtaýshy adam tapsyrysta kórsetilgen taýardy jınap shyǵady, sosyn ony qaptamaǵa salyp, dorbanyń syrtyna tapsyrys nómirin jazyp qoıady.
Jınaqtaýshy dep otyrǵanymyz – kádimgi qoıma qyzmetkerleri. Olar darkstordyń qaı buryshynda qandaı taýar jatqanyn bes saýsaǵyndaı jatqa biledi. Sonyń arqasynda tapsyrys jyldam jınaqtalady. Tipti tapsyrys biriniń artynan biri, irkes-tirkes túsip jatqanda da qarbalas týyndap, kezek kútetin jaǵdaı týyndamaıdy.
Qoıma sóreleriniń reti de osyǵan sáıkestendirip túzilgen. Eń kóp suranys túsetin, salmaǵy aýyr degen taýarlar kýrerge taýar tabystaıtyn orynǵa jaqyn jaıǵastyrylady. Basqasha aıtsaq, mundaǵy sórelerdiń ornalasý tártibi sýpermarkettegi standartty retten múlde bólek.
ıAndeks Lavka otandyq óndirýshilerdiń taýarlaryna úlken kóńil bóledi: darkstorda qazaqstandyq jáne ımporttyq ónimder qatar tur.
Darkstordan azyq-túlikten bólek kofeni de tapsyryspen aldyrýǵa bolady. Kýrer darkstorǵa jaqyndaǵan kezde kofe qaınatyla bastaıdy. Osynyń arqasynda kofe sýyp úlgermeıdi, al kýrer onyń qaınaýyn kútip, ýaqyt joǵaltpaıdy.
Tutynýshylar ystyq kofeden basqa býrger, nagets sııaqty daıyn tamaqqa da tapsyrys beredi. Osy tapsyrystardy dereý oryndaý úshin darkstorlardyń bazasynda arnaıy ashanalar uıymdastyrylǵan. Munda qoımashylardan bólek aspazdar da jumys isteıdi.
Osy jumystyń bári minsiz atqarylyp, azyq-túlik sapasy talapqa saı bolýy úshin arnaıy qyzmetkerlerdiń kómegimen qyzmet sapasy qadaǵalanady. Olar tazalyq pen sanıtarlyq jumystardyń ýaqtyly oryndalýyn ǵana qadaǵalap qoımaı, azyq-túliktiń jaramdylyq merzimi ótpeýin baqylaýda ustaıdy. Buǵan jasandy ıntellekti de kómektesedi. «Aqyldy» júıe qoımaǵa kelip túsken ár taýardyń jaramdylyq merzimin tirkeıdi. Kún saıyn esep berip otyrady. Qoıma qyzmetkeri sol eseptegi málimetti aralap júrip, jiti tekserip shyǵady. Qoımashy óz kezeginde eki ret osyndaı tekserý júrgizedi. Al tez buzylatyn azyq-túliktiń sapasyn qoıma dırektory jaramdylyq merzimine qarap qana emes, tııanaqtylyqpen baqylaýynan ótkizedi.
Tapsyrys tizimi boıynsha jınaqtalǵan taýar kýrerdiń qolyna tımeı turyp, taǵy bir márte tekseriledi. Osydan keıin ǵana tutynýshyǵa jol tartady.
Jetkizýshige tapsyrys berýshiniń derekteri berilmeıdi. Tek tapsyrysty aparatyn mekenjaı ǵana aıtylady. Tipti tapsyrys dorbasynyń ishine qandaı azyq-túlik salynǵany da kýrer úshin qupııa kúıinde qalady.
Kýrerdiń tapsyrys berýshige jetetin baǵdaryn da aqyldy júıe túzip beredi. Jetkizý ýaqyty orta eseppen 15 mınýttan bastalady.