Azyq-túlik tapshylyǵy: 295 mıllıon adam zardap shegip otyr — BUU
ASTANA. KAZINFORM — Birikken Ulttar Uıymynyń 2025 jylǵy jahandyq azyq-túlik daǵdarysy jónindegi esebine sáıkes, 2024 jyly álemde ótkir azyq-túlik tapshylyǵyn bastan keshirgen adamdar sany rekordtyq deńgeıge jetti. Bul jaǵdaı alty jyl qatarynan jaǵdaıdyń kúrdelenýine baılanysty bolýy múmkin, dep jazdy Reuters saıty.
Jalpy, 53 elde shamamen 295 mıllıon adam aýyr ashtyq jaǵdaıynda ómir súrip jatyr, bul 2023 jylmen salystyrǵanda 5% kóp. Ashtyqtyń negizgi sebebi retinde soǵys qaqtyǵystary, klımattyq ózgerister men ekonomıkalyq qıyndyqtar ataldy.
Qaqtyǵystar shamamen 140 mıllıon adamnyń ómirin qıyndatyp, Sýdan men Gaza sektorynda ashtyq resmı túrde rastaldy. Sonymen qatar, Ońtústik Sýdan, Gaıtı jáne Malı elderinde ashtyqtyń deńgeıi artqan.
Klımattyq faktorlar, onyń ishinde El-Nıno qubylysy, 96 mıllıon adamǵa áser etip, aýyl sharýashylyǵy men azyq-túlik qaýipsizdigine úlken soqqy boldy.
Ekonomıkalyq daǵdarystar, ınflıatsııa men valıýtalardyń qunsyzdanýy 59,4 mıllıon adamdy azyq-túlik jetispeýshiligine dýshar etti.
2024 jyly ashtyq jaǵdaıynda bolǵan adamdardyń sany 1,9 mıllıonǵa jetip, bul kórsetkish ótken jylmen salystyrǵanda eki ese ósken.
Sonymen birge, 5 jasqa deıingi 38 mıllıon bala tamaqqa zárý.
2025 jyly jaǵdaı odan ári nasharlaýy yqtımal, óıtkeni gýmanıtarlyq kómek, sonyń ishinde AQSh Halyqaralyq damý agenttiginiń qoldaýy aıtarlyqtaı qysqardy.
Degenmen, 15 elde kómek pen qoldaý arqasynda jaǵdaıdyń jaqsarǵany baıqalady.
BUU esebi ashtyqpen kúreste jergilikti aýyl sharýashylyǵyn damytý men ınvestıtsııa salýdyń mańyzdylyǵyn atap kórsetedi.
Eske sala keteıik, buǵan deıin Gazada 65 000-nan astam bala ashtyq saldarynan emdelip jatqanyn jazǵan edik.