Azyq-túlik taǵy arzandaı tústi
ASTANA. KAZINFORM - 2026 jylǵy 9 qyrkúıektegi jaǵdaı boıynsha esepti aptada Qazaqstanda birqatar áleýmettik mańyzy bar azyq-túlik taýarlarynyń baǵasy tómendegeni baıqaldy, dep habarlaıdy QR Strategııalyq josparlaý jáne reformalar agenttiginiń Ulttyq statıstıka bıýrosynyń telegram arnasy.
Apta ishinde kartoptyń (-6,9%), pııazdyń (-5,9%), aq qyryqqabattyń (-5,1%), sábizdiń (-4,5%), almanyń (-0,8%), nannyń (-0,4%) jáne irimshiktiń (-0,3%) baǵasy tómendedi.
Osy aptada birinshi surypty bıdaı uny, rojkı, sút jáne súzbe baǵasy ózgerissiz qaldy.
Óńirlik bóliniste eldiń birqatar qalalarynda deflıatsııalyq dınamıka baıqaldy. Bir apta ishinde áleýmettik mańyzy bar azyq-túlik taýarlarynyń baǵalarynyń jalpy deńgeıi Astana, Atyraý, Jezqazǵan, Qyzylorda, Óskemen, Semeı jáne Túrkistan qalalarynda 0,1%-ǵa tómendedi. Almaty, Aqtóbe, Qaraǵandy, Qostanaı jáne Taraz qalalarynda baǵalar aldyńǵy apta deńgeıinde saqtaldy.
Respýblıka boıynsha pııazdyń ortasha baǵasy bir kılogramyna 156 teńgeni qurady. Bul rette eń tómen baǵa Pavlodar qalasynda tirkeldi – bir kılogramyna 123 teńge.
El boıynsha sábizdiń ortasha baǵasy bir kılogramyna 227 teńgeni qurady. Eń tómen baǵa Pavlodar qalasynda tirkeldi – bir kılogramyna 146 teńge.
Respýblıka boıynsha kartoptyń ortasha baǵasy bir kılogramyna 217 teńgeni qurady. Eń qoljetimdi baǵalar Pavlodar qalasynda – 152 teńge jáne Qostanaı qalasynda – 184 teńge deńgeıinde tirkeldi.
Respýblıka boıynsha qyzanaqtyń ortasha baǵasy bir kılogramyna 586 teńgeni qurady. Eń tómen baǵa Taraz qalasynda tirkeldi – bir kılogramyna 347 teńge.
Et ónimderiniń ishinde respýblıka boıynsha súıekti sıyr etiniń ortasha baǵasy bir kılogramyna 3 819 teńgeni, taýyq etiniń baǵasy – 1 747 teńgeni qurady.
-Áleýmettik mańyzy bar azyq-túlik taýarlary baǵalary ındeksiniń kórsetkishi apta saıyn esepteledi. Baǵalardy baqylaý barlyq oblys ortalyqtarynda, respýblıkalyq mańyzy bar qalalarda jáne astanada júrgiziledi. Áleýmettik mańyzy bar azyq-túlik taýarlary baǵasynyń dınamıkadaǵy ózgeristerin Qazaqstan Respýblıkasy Strategııalyq josparlaý jáne reformalar agenttigi Ulttyq statıstıka bıýrosynyń saıtynan jáne «Taldaý» aqparattyq-taldaý júıesinen kórýge bolady,-delingen habarlamada.
Osyǵan deıin birqatar áleýmettik mańyzy bar azyq-túlik taýarlary arzandaǵany týraly jazdyq.
